भक्तपुर, भदौ १५
फ्रान्सको पेरिसमा जारी पारालिम्पिक्समा नेपाललाई ऐतिहासिक कांस्य पदक दिलाएकी तेक्वान्दो खेलाडी पलेशा गोवर्धनले सरकारबाट ६५ लाख रुपैयाँ पुरस्कार रकम पाउने भएकी छिन् । राष्ट्रिय खेलकुद विकास नियमावली २०७९ अनुसार पलेशाले सो रकम पुरस्कार पाउने भएको हो ।
नियमावली २०७९ मा ग्रीष्मकालीन÷शीतकालीन÷पारा÷विशेष ओलम्पिक तथा र विश्वकप फुटबलमा कांस्य जित्ने खेलाडीलाई ६५ लाख रुपैयाँ पुरस्कार दिने व्यवस्था छ । सो अनुसार पलेशाले ६५ लाख रुपैंया पुरस्कार पाउने भएको हो ।
नियमावली अनुसार पलेशाका प्रशिक्षक कविराज नेगी लामाले ५ लाख ८५ हजार र नेपाल तेक्वान्दो संघले ११ लाख ७० हजार रुपैयाँ पुरस्कार पाउनेछन् । नियमावलीमा व्यक्तिगततर्फ स्वर्ण पदक जित्नेलाई १ करोड ३० लाख, रजत पदक जित्नेलाई ९७ लाख पुरस्कार दिने व्यवस्था छ ।
पलेशाले पेरिसमा जारी पारालिम्पिक्समा शुक्रवार तेक्वान्दोको के ४४ क्याटेगोरी अन्तर्गत महिला ५७ केजी मुनी कास्य पदक जितेकी हुन् । उनले सर्बियाकी खेलाडीलाई १५–८ ले ओलम्पिक इतिहासमा नेपाललाई पहिलो पदक जिताएकी हुन् । ओलम्पिकमा ६ दशकदेखि सहभागिता जनाउँदै आए पनि नेपालले पदक जित्न सकेको थिएन ।
पलेशाले पहिलो खेलमा भेनेजुएलाकी मोरालेसलाई ३१–० को पराजित गर्दै क्वाटरफाइनलमा स्थान बनाएकी थिइन् । तर क्वाटरफाइनलमा पलेशा विश्व नम्बर ब्राजिलियन खेलाडी सिल्भाना मायारा पर्नान्डेजसँग १०–८ ले पराजित हुन पुगेकी थिइन् । त्यसपछि रिपेचेजमा फ्रान्सकी सोफी काभरजानलाई २–१ ले पराजित गर्दै पलेशा कांस्य पदक नजिक पुगेकी थिइन् ।
