भक्तपुर, साउन ३२
जिल्ला प्रशासन कार्यालय भक्तपुरले मध्यपुर थिमि–३, गठ्ठाघरमा बिहिवार दिउँसो एक जनाको घटनास्थलमा नै मृत्यु हुने गरी भएको सवारी दुर्घटनाको सत्यतथ्य अध्ययन गरी सार्वजनिक गर्न एक समिति गठन गरेको छ ।
प्रमुख जिल्ला अधिकारी रोशनी कुमारी श्रेष्ठले सरोकारवाला विभिन्न निकाय र संघ संस्थासँगको छलफलपछि सहायक प्रमुख जिल्ला अधिकारी डोरेन्द्र निरौलाको संयोजकत्वमा चार सदस्यीय समिति गठन गरेको हो ।
समितिलाई सात दिनभित्र घटनाको सत्यतथ्य अध्ययन गरी प्रतिवेदन तयार गर्ने जिम्मेवारी दिईएको छ । समितिमा जिल्ला प्रहरी परिसर भक्तपुरका प्रहरी नायव उपरिक्षक राजन कार्की, यातायात व्यवस्था कार्यालय सवारी चालक अनुमति पत्र रोधरोधका मेकानिकल ई. उत्तम बस्नेत र नागरिक समाजका तर्फबाट तुलसीहरी कोइराला रहनुभएको छ ।
समितिले भदौ १ गते शनिवारबाट नै घटनाको अध्ययन शुरु गरिने समितिका संयोजक सहायक प्रजिअ निरौलाले बताउनुभयो । उहाँले घटनाको सम्बन्धमा जे जति विषय उठान भएको छ, ती विषयमा गम्भिर ढंगले अध्ययन गरी प्रतिवेदन सम्बन्धीत निकायमा बुझाईने जानकारी समेत दिनुभयो ।
गठ्ठाघरमा बिहिवार दिउँसो काठमाण्डौंबाट भक्तपुरतर्फ आउँदैं गरेको ना ६ ख २१७३ नम्बरको १४ चक्के ट्रक र बा ३९ प ८९४४ नम्बरको स्कुटर एक आपसमा ठक्कर खाई दुर्घटना हुँदा स्कुटर चालक ओखलढुंगा घर भई हाल काठमाण्डौं कपन बस्ने उत्तम कोइरालाको घटनास्थलमा नै मृत्यु भएको थियो ।
