भक्तपुर, असार १६
भक्तपुरको मध्यपुर थिमि नगरपालिका भित्रका सामूदायिक विद्यालयहरु मध्ये माध्यमिक शिक्षा परीक्षा (एसईई) २०८० मा आदर्श माध्यामिक विद्यालय सानोथिमिले उत्कृष्ट नतिजा ल्याउन सफल भएको छ ।
शिक्षा शाखाका अनुसार परीक्षामा आदर्श मावि सानोथिमिबाट एसईईमा १३८ जना सहभागी भएका थिए । ती मध्ये ११९ जना उत्तीर्ण भएका छन, जुन ८६ दशमलब २३ प्रतिशत हो । सो उत्तीर्ण प्रतिशतका आधारमा उक्त विद्यालयले नगरपालिका भरमा उत्कृष्ट नतिजा हासिल गरेको छ ।
त्यसैगरी नगदेशको गणेश माध्यमिक विद्यालयमा ७३ दशमलब ४३ प्रतिशत विद्यार्थी उत्तीर्ण भएका छन् । सो विद्यालयबाट ६४ जना विद्यार्थी सहभागी भएका थिए ।
आदर्श मावि लायकू थिमिबाट ७८ जना सहभागी भएकामा ५३ दशमलब ८४ प्रतिशत विद्यार्थीमात्र उत्तीर्ण भएको शिक्षा शाखाले जनाएको छ । यसैगरी बालप्रेमी माविबाट ४३ दशमल २४ प्रतिशत विद्यार्थी उत्तीर्ण भएका छन् । सो विद्यालयबाट एसईईमा ३७ जना सहभागी भएका थिए ।
यता बोदे माविबाट ६८ जना सहभागी भएकामा १६ दशमलब १८ प्रतिशत विद्यार्थी मात्र उत्तीर्ण भएका छन् । मध्यपुर थिमिमा सबै भन्दा खराव नतिजा जनक सिद्धिकाली माविको रहेको छ । उक्त विद्यालयबाट ११ जना विद्यार्थी एसईईमा सहभागी भएकोमा जम्मा २ जना मात्र उत्तीर्ण भएका छन । प्रतिशतको हिसाबले उक्त विद्यालयका १८ दशमलब १८ प्रतिशत विद्यार्थीमात्र उत्तीर्ण छन् ।
मध्यपुर थिमि नगरपालिकाको ६ वटा सामूदायिक माध्यमिक विद्यालयबाट एसईई २०८० मा कूल ३९६ जना विद्यार्थी सहभागी भएकामा परीक्षामा २३७ अर्थात् ५९दशमलब ८४ प्रतिशतमात्र उत्तीर्ण भएका छन् । परीक्षाफल अनुसार ४० दशमलब १५ प्रतिशत अर्थात् १५९ जनाको ननग्रेड आएको छ ।
