भक्तपुर, मंसिर १४
नेकपा(एमाले) को ११ औँ राष्ट्रिय महाधिवेशनका लागि भक्तपुर जिल्लामा सर्वसम्मत प्रतिनिधि चयन भएको छ । एमालेले भक्तपुरको दुई वटै निर्वाचन क्षेत्रबाट १४ जना महाधिवेशन प्रतिनिधि शनिवार सर्वसम्मत चयन गरेको हो ।
विधान बमोजिम भक्तपुर क्षेत्र नं. १ बाट ५ जना, क्षेत्र नं. २ बाट ८ जना र दलितबाट एक जना सर्वसम्मत चयन भएको नेकपा एमाले जिल्ला अध्यक्ष वचन देउजाले जानकारी दिनुभयो ।
भक्तपुर र चाँगुनारायण नगरपालिका रहेको निर्वाचन क्षेत्र नम्बर १ बाट रामबहादुर श्रेष्ठ, मनोज केसी, सपना तामाङ, दुर्गा थापा लामिछाने र बिष्णु तामाङ चयन भएका हुन । रामबहादुर र मनोज खुलाबाट तामाङ र लामिछाने महिलाबाट र बिष्णु युवाबाट छानिएको अध्यक्ष देउजाले बताउनुभयो ।
यसैगरी सूर्यविनायक र मध्यपुर थिमि नगरपालिका रहेको निर्वाचन क्षेत्र नम्बर २ बाट राजेन्द्र राजथला, शिवराम राउत, सानुकाजी कायस्थ, सूर्यलाल श्रेष्ठ, तारा सापकोटा, अनिता पाण्डे, सकुन्तला श्रेष्ठ, सुमन जोशी महाधिवेशन प्रतिनिधि चयन भएका छन । राजेन्द्र, शिवराम, सानुकाजी र सूर्यलाल खुलाबाट तारा अनिता र सकुन्तला महिलाबाट तथा सुमन र दिपक युवाबाट चयन भएको प्रमुख निर्वाचन अधिकृत भगवान खड्काले बताउनुभयो ।
यस्तै जिल्लाभरीबाट चयन हुने दलित प्रतिनिधिमा दिपक बिशुङ्खे चयन भएको खड्काले बताउनुभयो ।
केन्द्रीय नेतृत्व चयन गर्ने महाधिवेशनका लागि प्रतिनिधि बन्न भक्तपुरबाट १ सय १० जना नेताहरूले आकांक्षा राखेका थिए । ती आकांक्षीहरुबाट विभिन्न चरणमा छलफल गरी अन्ततः सर्वसम्मत प्रतिनिधि चयन गर्न सफल भएको हो ।
यससँगै पोलिट्व्यूरो सदस्य महेश बस्नेत, केन्द्रीय सदस्य एवं क्षेत्र नम्बर १ का इन्चार्ज सोमप्रसाद मिश्र, केन्द्रीय सदस्य एवं क्षेत्र नम्बर २ का इन्चार्ज निर्मल भट्टराई, केन्द्रीय सदस्यहरु गोविन्द दुलाल, तुलसा दाहाल र विणा बास्तोला महाधिवेशन आयोजक समितिका सदस्यका रुपमा स्वतः महाधिवेशन प्रतिनिधि हुनेछ ।
त्यस्तै, केन्द्रीय विभाग र समितिबाट प्रतिनिधित्व गर्ने नवराज गेलाल, शशीजङ्ग थापा र सरस्वती बाटी पनि महाधिवेशन प्रतिनिधि भएको बताइएको छ ।
जिल्लाबाट सर्वसम्मत भएका १४ महाधिवेशन प्रतिनिधि, विभाग र समितिमा रहेका ३ र आयोजक समितिका ६ गरि २३ जनाले नेकपा एमालेको महाधिवेशनमा भक्तपुरको प्रतिनिधित्व गर्दै नेतृत्व चयन गर्नेछ ।
नेकपा एमालेको ११ औं महाधिवेशन यही मंसिर २७–२९ सम्म काठमाण्डौंमा हुने तय भएको छ । महाधिवेशनको उद्घाटन भक्तपुरको सल्लाघारीस्थित खुला चउरमा हुने र बन्दसत्र काठमाण्डौंको भृकुटीमण्डपमा हुने कार्यक्रम रहेको छ ।
