भक्तपुर, मंसिर १३
नेपाल युएईमा जारी एसिसी पुरुष यू–१९ प्रिमियर कपको फाइनलमा प्रवेश गरेको छ । उत्कृष्ट बलिङ गरेको नेपालले शनिवार सम्पन्न सेमिफाइनलमा मलेिसयालाई ९ विकेटले पराजित गर्दै फाइनलमा स्थान बनाएको हो । नेपालले सोमवार उपाधिका लागि युएईसँग प्रतिष्पर्धा गर्नेछ ।
जितसँगै नेपाल एसिसी यु–१९ एसिया कपको लागि छनोट भएको छ । प्रिमियर कपको शीर्ष ३ टोली एसिया कपका लागि छनोट हुने प्रावधान छ ।
जितको लागि ५२ रनको झिनो लक्ष्य पाएको नेपालले ७ ओभर ५ बलमा १ विकेट गुमाएर पूरा गर्यो । ओपनर निरज कुमार यादव ४ रनमा मुहम्मद अक्रमको बलमा आउट भए ।
त्यसपछि वंश क्षेत्री र निश्चित क्षेत्रीले दोस्रो विकेटको लागि अविजित ५१ रनको साझेदारी गर्दै सहज जित दिलाए । वंशले २७ बलमा ३ चौका सहित अविजित २३ रन बनाए । निश्चलले १८ बल खेलेर २ चौका सहित अविजित १५ रन बनाए ।
त्यसअघि अजमानको सेभेन डिस्ट्रिक्ट मैदान–२ मा टस जितेर नेपालले बलिङ रोज्यो । पहिले ब्याटिङ गरेको मलेसियाले निर्धारित ५० ओभरको खेलमा १७ ओभरमा ५१ रन जोडेर अल आउट भयो ।
नेपाली बलरसामु निरिह बनेको मलेसिया ८ रनमा ५ विकेट गुमाए। दयनीय अवस्थामा पुगेको थियो । ओपनर अजिब वाज्दी २ रनमा, मोहम्मद हारिज रनको खाता नखोली, मोहम्मद हेरिल, कप्तान डियाज पाट्रो र नागिनेश्वरन सथना कुमारन १÷१ रनमा आउट भए ।
यसपछि मोहम्मद अक्रम १ रनमा र मोहम्मद आलिफ ४ रनमा आउट हुन पुगे । १३ रन बनाउँदा ७ विकेट गुमाएको मलेसियाको इनिङ्स धराशायी बन्यो । पहिलो देखि सातौं क्रमका कुनैपनि ब्याटरले दोहोरो रन छुन सकेनन् ।
यसपछि आशयारफ रिफाइ र मुहम्मद फातुलले आठौं विकेटको लागि २० रनको साझेदारी गरे । आशयारफ ६ रनमा आउट भए । फातुल पनि ११ रन जोडेर आउट भए ।
यस्तै हम्जा पांगी १३ रनमा पबिलियन फर्के सँगै मलेसिया अल आउट भयो । उनी नै मलेसियाको लागि सर्वाधिक रन स्कोर गर्ने खेलाडी बने ।
बलिङमा नितेश कुमार पटेलले ८ ओभरमा २४ रन दिएर ४ विकेट लिए । चन्दन रामले ५ ओभरमा १७ रन दिएर ३ विकेट लिए । यस्तै अपराजित पौडेल, अशोक धामी र रोशन विश्वकर्माले १÷१ विकेट लिए ।
नेपाल लगातारको तेस्रो जितमा समूह विजेता बन्दै सेमिफाइनलमा पुगेको हो । नेपाल जारी प्रतियोगितामा अपराजित रहेको छ । अब उपाधिको लागि नेपालले सोमवार युएईसँग खेल्नेछ ।
