भक्तपुर, मंसिर १३
डब्लुकेएफ २७ औं कराते विश्व च्याम्पियनसिपको महिला ६८ केजी माथि तौल समूह नेपालकी एरिका गुरुङको यात्रा प्रिक्वाटरफाइनलमा नै रोकिएको छ । क्वाटरफाइनल प्रवेशका लागि भएको भिडन्तमा ईजिप्टका खेलाडीसँगै आफ्नै गल्तीले पराजित भएपछि एरिकाको यात्रा प्रिक्वाटरफाइनलमा नै रोकिएको हो ।
प्रिक्वाटरफाइनलमा उनी ईजिप्टका खेलाडी ओकिला साबानसँग अयोग्य घोषित हुँदैं पराजित भएकी हुन । खेलमा एक मिनेट समय बाँकी हुँदा एरिका २–० ले अघि थिइन । खेल १३ सेकेण्ड बाँकी हुँदासम्म एरिका २–१ ले अघि थिइन । तर यही बेला उनले गल्ती गर्न पुगिन र रेफ्रीले उनलाई डिस्क्वालिफाई अर्थात अयोग्य घोषित गरिदिए । यसैको कारण जित्दा जित्दै खेल गुमाउन पुगिन र क्वाटरफाइनल प्रवेशबाट बञ्चित भइन ।
यसअघि एसियाली खेलकुदकी रजत पदक विजेता एरिका समूहको पुल–७ बाट उपविजेताको रुपमा नआउट चरणमा प्रवेश गरेकी थिइन । उनले समूह उपविजेता बनेर प्रि–क्वाटरफाइनलमा प्रवेश गर्न चिल्लीकी गोन्जालेज लाभिनलाई ५–१ को अन्तरमा पराजित गरेकी थिइन ।
त्यसअघिको खेलमा फ्रान्सकी गार्सियासँग ४÷४ को बराबरी खेलिन् । तर उनी सेन्सोको आधारमा गार्सियासँग पराजित हुन पुगिन् । यस्तै पोल्यान्डकी जुलिया ड्यानिस्कासँग पनि एरिकाले २–० को हार बेहोरेकी थिइन ।
तर यो पुलबाट हाई स्कोरको आधारमा एरिका उपविजेता बन्दै प्रि–क्वाटरफाइनलमा पुगिन् । यो पुलबाट फ्रान्सकी गार्सिया समूज विजेता बनेकी थिइन ।
सोही च्याम्पियनसिपमा अर्का नेपाली खेलाडी सानुमाया थिङ एकल काताको समूह चरणबाटै बाहिरिएकी थिइन । पहिलो खेलमा सानुमाया कोलम्बियाकी खेलाडी मचादो भ्यालेन्टिना जापातासँग हारिन् । सानुमायाले ३६.१ र मचादोले ३८.८ स्कोर गरिन् ।
अर्को खेलमा सानुमाया आयोजक इजिप्टकी आया हेस्मामसँग ३९.४–३५.६ ले पराजित भइन् । त्यस्तै सानुमाया अन्तिम खेलमा फ्रान्सकी हेल्बिटिया ताइलीसँग ३९.५ – ३६.८ ले पछाडि परिन् । सानुमायाको ३ खेलमा उच्च प्रदर्शन ३६.८ को रह्यो ।
विश्व वरीयताको आधारमा उनी विश्व च्याम्पियनसिपका लागि छनोट भएकी हुन् । गत मेमा उज्वेकिस्तानमा भएको एसियन च्याम्पियनसिपमा गरेको प्रदर्शनका आधारमा सानुमायाले यो सफलता पाएकी हुन् ।
