भक्तपुर, कार्तिक ३०
विवादित मेडिकल व्यवसायी दुर्गा प्रसाई समर्थित राजनैतिक दल नागरिक बचाउ दलको केन्द्रीय समितिमा भक्तपुरका दुई जना रहेका छन ।
प्रसाईंको समर्थनमा नागरिक बचाउ दल निर्वाचन आयोगमा दर्ताको लागि आइतवार निवेदन दिएको हो । प्रसाईंले राष्ट्र, राष्ट्रियता, धर्म, संस्कृति र नागरिक बचाउ महाअभियान चलाउँदै आएका छन् । यही महाअभियानसँग मिल्दो नाममा दल बनाएका हुन् ।
दलको सभापतिमा झापा निवासी ५० वर्षीय माधव प्रसाद खतिवडा प्रस्तावित छन् भने उपसभापतिमा ईश्वरी प्रसाद भट्टराई (काठमाडौंं) र देवीप्रसाद संग्रौला छन् ।
महामन्त्री प्रेम कुमार थाम्सुहाङ (झापा), सहमहामन्त्री विष्णु बोहोरा क्षेत्री (नवलपरासी पूर्व), कोषाध्यक्ष सुष्मा रेग्मी रिजाल (मोरङ) र प्रवक्तामा प्रेम थापा मगर (पाल्पा) छन् ।
दलको २७ सदस्यीय कार्यसमितिमा भक्तपुरका रामकुमार कार्की र नवराज दुलाल छन । कार्कीको नाम पदाधिकारी पछि पहिलो नम्बरमा प्रस्ताव गरिएको छ भने दुलाल २० औं नम्बरमा रहेका छन ।
यो पार्टीले माथि सेतो, तल रातो र बीचमा तारा अंकित चारकुने झण्डा प्रस्ताव गरेको छ । चुनाव चिह्न भने मान्छेको जोडी पाइला प्रस्ताव गरिएको छ ।
