भक्तपुर, साउन २५
भक्तपुरको मध्यपुर थिमि–२ दिव्यश्वरी प्लानिङमा गत वर्ष भएको खुकुरी प्रहार गरेको घटनामा चक्रे मिलन भनिने मिलन गुरुङले आफ्नो संलग्नताको इन्कारी बयान दिएका छन ।
दिव्यश्वरी प्लानिङको एक रेष्टुरेन्टमा २०८१ भदौ १० गते मनिष रायमाझीमाथि खुकुरी प्रहार भएको थियो । उक्त घटनामा प्रहरीले ज्यान मार्ने उद्योगमा मुद्दा चलाएको थियो । मुद्दा दर्ता हुँदा चक्रे मिलन पक्राउ नपरेकोले उनलाई फरार सुचीमा राखेर मुद्दा अघि बढाएको थियो ।
हाल काठमाण्डौं प्रहरीले उनलाई पक्राउ गरेपछि भक्तपुर प्रहरीले पनि पुरानो मुद्दामा उनको संलग्नता बारे अनुसन्धान अघि बढाएको हो । सोही क्रममा सरकारी वकिलको कार्यालय भक्तपुरमा गत शुक्रबार दिएको बयानमा चक्रे मिलनले ज्यान मार्ने उद्योगको कसुरमा आफ्नो संलग्नता नरहेको यन्कारी बयान दिएका हुन ।
सरकारी वकिल स्रोतका अनुसार त्यो घटना हुँदा आफू घटनास्थलमा नभएको र आफ्नो कुनै संलग्नता पनि नभएको भनेर चक्रे मिलनले बयान दिएका हुन् । ‘म त्यहाँ थिइन भनेर इन्कारी बयान दिएका छन्,’ स्रोतले भने ।
अहिले चक्रे मिलनसहित उनको समूहका १९ जना काठमाडौं प्रहरीको हिरासतमा छन् । बयान लिएपछि भक्तपुर प्रहरीले चक्रे मिलनलाई काठमाडौं फिर्ता समेत गरिसकेको छ ।
खुकुरी प्रहार भएको घटनामा प्रहरीले सर्लाही घर भई ललितपुरको ग्वार्को बस्दै आएका २५ वर्षीय अजित खवासलाई पक्राउ गरेको थियो । उनले सफाइसमेत पाइसकेका छन् । खुकुरी प्रहारबाट मनिषको दुबै कोखामा चोट लागेको थियो । टाउकोमा समेत निलडाम हुने गरी कुटपिट गरेको आरोप थियो ।
