भक्तपुर, बैशाख २७
नेपाल क्रिकेट संघ (क्यान)ले आइसीसी क्रिकेट विश्वकप लिग–२ अन्तर्गत स्कटल्याण्ड भ्रमणका लागि १५ सदस्यीय नेपाली राष्ट्रिय क्रिकेट टोलीको घोषणा गरेको छ । क्रिकेटका नवनियुक्त मूख्य प्रशिक्षक स्टुआर्ट लले रोहित पौडेलको कप्तानीमा टोली शनिवार १५ सदस्यीय टोली घोषणा गरेका हो ।
टोलीमा दीपेन्द्र सिंह ऐरीलाई उपकप्तानको जिम्मेवारी दिएको छ । ज्ञानेन्द्र मल्ल कप्तान हुँदा दिपेन्द्र उपकप्तान थिए । क्यानले अनुशासनको कारवाही गर्दै तत्कालिन कप्तान ज्ञानेन्द्र र उपकप्तान दिपेन्द्रलाई जिम्मेवारीबाट हटाएको थियो । त्यसपछि क्यानले सन्दिप लामिछानेलाई कप्तानको जिम्मेवारी दिएको थियो । उनी जबरजस्ती करणी सम्बन्धी मुद्दाका कारण निलम्वनमा परेपछि क्यानले रोहितलाई कप्तान बनाएको थियो ।
टोलीमा विकेटकिपरद्वय आसिफ शेख र अनिल कुमार शाह टोलीमा छन् । कुशल भुर्तेल, भीम सार्की र आरिफ शेख मात्र ब्याटर रहेका छन् । अलराउन्डर गुलशन झा र बसीर अहमदले पनि टोलीमा स्थान बनाएका छन् । बलरहरु सन्दीप लामिछाने, सोमपाल कामी, करण केसी, नन्दन यादव, रिजन ढकाल र ललित नारायण राजवंशी टोलीमा अटाएका छन् ।
क्यानले लिग–२ को सिरिजपछि हुने टि–२०आई सिरिजका लागि पनि ३ खेलाडीको नाम राखेको छ । ब्याटर किरण ठगुन्ना र लोकेश बमसँगै अलराउन्डर रुपेश सिंह टोलीमा छन् ।
नेपालले स्कटल्याण्ड भ्रमणमा लिग–२ अघि अभ्यास खेलहरु खेल्नेछ । स्कटल्याण्ड ए सँग दुई अभ्यास खेल पनि रहेको छ । लिग–२ अन्तर्गत नेपालले जुन २ र जुन ८ मा स्कटल्याण्ड तथा जुन ४ र जुन १० मा नेदरल्यान्ड्ससँग खेल्दैछ ।
