भक्तपुर, माघ १६
भक्तपुरको रोम्वस सेकेण्डरी स्कुलले अन्तराष्ट्रिय गुणस्तर चिन्ह प्रमाणपत्र ‘आइएसओ सर्टिफिकेट’ प्राप्त गरेको छ । भक्तपुरको कमलविनायकको टाउन प्लानिङमा अवस्थित उक्त विद्यालयले आइएसओ सटिर्फिकेट प्राप्त गरेको हो ।
एभरेष्ट इन्टरनेशनल म्यानेज्मेन्ट कन्सल्टेन्सी एण्ड टे«निङ एजेन्सी प्रा.लि.ले अन्तर्राष्ट्रिय स्तरको शैक्षिक गुणस्तरको मानकको रुपमा विद्यालयलाई आइएसओ सर्टिफिकेट दिँदै आएको छ ।
सोही कन्सल्ट्यान्सीले बुधबार विद्यालयलाई उक्त प्रमाणपत्र हस्तान्तरण गरेको हो । उक्त संस्थाले भक्तपुर जिल्लामा रहेका विद्यालयहरुमध्ये आइएसओ सर्टिफिकेट प्राप्त गर्ने रोम्वस भक्तपुर नगरपालिकाको पहिलो र जिल्लाको दोस्रो विद्यालय रहेको जनाएको छ ।
सर्टिफिकेट हस्तान्तरण कार्यक्रममा नेकपा (एस) का अध्यक्ष एवम् पूर्वप्रधानमन्त्री माधवकुमार नेपालले आइएसओ प्राप्त गर्न सफल रोम्वस स्कुललाई बधाई दिँदै विद्यालयले शिक्षा क्षेत्रमा छोटो अवधिमै उल्लेखनीय योगदान पुर्याउन सफल भएको बताउनुभयो ।
उहाँले अभिभावकको ध्यान आफ्नो बालबालिकाको भविष्यप्रति हुने भएकाले विद्यालयले अभिभावकको मनोविज्ञानलाई ध्यान दिनुपर्नेमा जोड दिनुभयो । ज्ञान र बुद्धि फरक विषय भएको उल्लेख गर्दै उहाँले अहिलेका पुस्तालाई संसारसँग स्पर्धा गर्ने ज्ञानको जरुरी रहेको बताउनुभयो । “विद्यालयले प्राप्त गरेको आइएसओ सर्टिफिकेटले त्यो आवश्यकता पूरा गर्ने मार्ग प्रशस्त गरेको छ,” उहाँले भन्नुभयो ।
बालबालिकालाई संस्कारयुक्त शिक्षा, नैतिक शिक्षा, सूचना प्रविधियुक्त शिक्षा र देशभक्तिपूर्ण शिक्षा जरूरी रहेको आवश्यकता औंल्याउँदै उहाँले भन्नुभयो, “घरमा घरको अनुशासन, विद्यालयमा विद्यालयको अनुशासन, समाजमा समाजको अनुशासन र पेशामा पेशागत अनुशासन भए शिक्षाको उद्देश्य साकार हुन्छ ।”
उहाँले आजका बालबालिका प्रफुल्ल भए भोली देश प्रफुल्ल हुने बताउँदैं नैतिकवान्, जिम्मेवार, अनुशासित नयाँ पुस्ताको जरुरीलाई पूरा गर्ने शिक्षाको खाँचो औंल्याउनुभयो ।
कार्यक्रममा कन्सल्टेन्सीका प्रवन्ध निर्देशक शैलेन्द्र खरेलले विद्यालय व्यवस्थापन समितिका अध्यक्ष सरिता कोजू र संस्थापक प्रिन्सिपल डा. राजेन्द्र कोजूलाई प्रमाणपत्र हस्तान्तरण गर्नुभएको थियो ।
सो अवसरमा डा. इवामुरा मेमोरियल अस्पतालको आकस्मिक शाखाका डा. विनोद दंगालले विद्यालयले प्राप्त गरेको सफलताको लागि बधाई दिनुभएको थियो । सांस्कृतिक कार्यक्रमसहित सम्पन्न कार्यक्रममा प्रिन्सिपल डा. कोजूले उक्त प्रमाणपत्रसँगै विद्यालयको शैक्षिक गुणस्तर सुनिश्चितताको आधार बनेको बताउनुभयो ।
