भक्तपुर, माघ १४
प्रधानमन्त्री केपी शर्मा ओलीले अहिलेको सरकारले विकास र स्थिरताको बलियो आधार तयार गरेरै छाड्ने बताउनुभएको छ । भक्तपुरको सूर्यविनायक नगरपालिकाको कटुञ्जेस्थित नवनिर्मित प्रशासकीय भवनको सोमवार उद्घाटन गर्दै प्रधानमन्त्री ओलीले सत्ताको खिचातानीमा मात्रै केन्द्रित हुने प्रवृत्तिबाट देशलाई मुक्त बनाउन दुई ठुला दलको सहकार्यमा बनेको अहिलेको सरकारले विकास र स्थिरताको बलियो आधार तयार गरेरै छाड्ने बताउनुभएको हो ।
राजतन्त्रका पालामा शासन टिकाउनका लागि मरिमेट्दा विकास राम्ररी हुन नसकेको बताउँदैं उहाँले लोकतन्त्र यताका विकास निर्माणको गति बेग्लै भएको बताउनुभयो ।
“अब नेपाल विकासको क्रममा अगाडी बढेको छ । जो भए पनि विकास भइहाल्छ भन्ने कुरा सही होइन । राम्रो प्रणाली नभईकन विकास हुँदैन । काम गर्ने खालको पार्टी सरकारमा नभएर विकास हुँदैन । । देश साँच्चै अप्ठ्यारोमा परेकाले दुई ठुला दलको सहकार्यमा देशलाई एकताबद्ध बनाउँदै सरकारले विकासको अगुवाइ गर्नेछ,” उहाँले भन्नुभयो ।
उहाँले सत्ता साझेदार कांग्रेसको बलियो साथ रहेकोले यो सरकारले कसैले छात्ति पिटेर बिलौना गर्दैमा नढल्ने बताउनुभयो । “सरकार अहिले ढल्यो, भरे ढल्यो भनेर कसैले छाति पिट्नु र बिलौना गर्नुको कुनै विकल्प छैन । नेपाली काँग्रेस र नेकपा (एमाले)ले अब देशलाई स्थिरता दिने संकल्प गरिसकेका छन् । यसमा ढुक्क भए हुन्छ,” उहाँले भन्नुभयो ।
प्रधानमन्त्री ओलीले पूर्व सहमतिअनुसार अहिले आफूले कांग्रेसबाट पूराका पूरा साथ पाएको र भोलि कांग्रेस नेतृत्वको सरकारलाई पनि एमालेले पूराका पूरा साथ दिने स्पष्ट गर्नुभयो । उहाँले संसदको हिउँदें अधिवेशनलाई कानुन निर्माणका व्यापक काम दिने पनि जनाउँदै सहमति भए छिटै संविधान संशोधन हुने र सहमति नभएमा केही समय लाग्ने स्पष्ट गर्नुभयो ।
प्रधानमन्त्री ओलीले आफूलाई रुघाखोकी लागेको समयमा अस्पतालको आइसियुमा रहेका बेलामा तस्बिर सार्वजनिक गरेर भ्रम फैलाइएकामा टिप्पणी गर्दै भन्नुभयो, “मलाई रुघाखोकी लागेको हो । एन्टीबायोटिकले अलि कमजोर बनाएको छ तर हाँच्छ्यू गरेको देख्यो भने आइसियु कक्षमा बसेको फोटो आइहाल्छ । खोक्न पाएको छैन आइसियुमा बसेको देखाउँछन् ।”
प्रधानमन्त्री ओलीले सरकारको विरोध गर्ने नाममा सीमित संख्या भएकाहरुको मोर्चा शक्ति बनाए भनेर चेतावनी दिनेहरुको भ्रमबाट मुक्त हुन पनि आग्रह गर्नुभयो ।
प्रधानमन्त्री ओलीले नयाँ भवनलाई सदुपयोग गरेर अझ सहज र सरलताका साथ जनतालाई सेवा पुग्ने र आगामी योजनाबद्ध विकास बन्ने विश्वास व्यक्त गर्दै सोझा जनतालाई आतंकको छायाँमा राखेर चुनाव जित्ने जमाना सकिएकाले लोकतान्त्रिक अभ्यासबाट एकताबद्ध भएर अघि बढ्न आग्रह गर्नुभयो ।
कार्यक्रममा प्रतिनिधिसभाका सदस्य दुर्लभ थापाले आफु जनप्रतिनिधि हुँदा विकासको मूल फुटेको र अहिले नहुँदा विकास रोकिएको भनेर भ्रममा नपर्न आग्रह गर्नुभयो । उहाँले विकास निर्माण नियमित प्रक्रिया भएको बताउँदैं भन्नुभयो, “यदि भक्तपुरमा विकासको गति रोकिएको भए कहाँ, कसरी, कसले रोक्यो प्रधानमन्त्रीले स्पष्ट पार्नुपर्छ ।” उहाँले अमूक व्यक्ति सत्तामा हुँदा मात्र वा जनप्रतिनिधि हुँदा मात्र विकास हुन्छ भन्ने भ्रम पनि नराख्न आग्रह गर्नुभयो ।
उहाँले विकास निर्माण कसैको खल्तीको पैसाले नभई राज्यको ढुकुटी प्रयोग गरेर हुने चर्चा गर्दै कोभिड महामारीपछिको समयमा आर्थिक गतिविधि सुस्ताउँदा राज्यको आर्थिक अवस्था कमजोर भएकाले पनि विकास निर्माण असर परेको बताउनुभयो ।
उहाँले सूर्यविनायकमा बन्ने भनेको प्राणी उद्यानलाई तत्काल अघि बढाउन आगामी वर्षको बजेटमा आवश्यक बजेट विनियोजन आग्रह गर्नुभयो । उहाँले विगतमा जग्गा प्लटिङ गर्नेको स्वार्थमा सडक बन्ने गरेको टिप्पणी गर्दै विकासमा सहकार्य र राजनीतिमा प्रतिपष्र्धा गर्न तयार रहेको बताउनुभयो ।
पूर्वमन्त्री महेश बस्नेतले आफु निर्वाचन हारेर पनि मन्त्री भएको स्मरण गराउँदैं १३ महिना उद्योग मन्त्री हुँदा भक्तपुरमा विकासको वृजारोपण गरेको र पछि निर्वाचन जितेर सांसद हुँदा भक्तपुरमा विकासको मूल फुटाएपनि अहिले ठप्प भएको दावी गर्नुभयो । उहाँले अन्तराष्ट्रिय रंगशाला निर्माणमा केही राजनीतिक दलको विरोधका कारण सम्भव नभएको बताउँदैं नगरपालिका घोषणा हुँदा कुनै पूर्वाधार नभएको सूर्यविनायकमा अहिले जताततै बाटोघाटो, खानेपानीको सूविधा आफ्नै पहलमा भएको दावी गर्नुभयो ।
कार्यक्रममा सूर्यविनायक नगरपालिकाका प्रमुख बासुदेव थापाले ६ रोपनी जग्गा मध्ये ३ रोपनीमा फैलिएको भवनमा दुईवटा लिफ्ट, तीन सय जना अट्ने सेमिनार हल, दुईवटा बैठक कक्ष, एउटा पुस्तकालय, एउटा तालिम कक्ष र ९२ वटा कार्यकक्ष रहेको जानकारी दिनुभयो ।
उहाँले नयाँ भवन बाबुरत्न जेभी कन्स्ट्रक्सन कम्पनीले भ्याटबाहेक २० करोड ४१ लाख ५२ हजार रुपैयाँमा निर्माण सम्पन्न गरेको बताउनुभयो । कोभिडका कारण भवन निर्माणमा दुई वर्ष ढिला भएको जानकारी दिँदैं उहाँले दुई साँगुरा कोठाबाट शुरु भएको सूर्यविनायक नगरपालिकाको दैनिक कार्य हाल अत्याधुनिक भवनबाट शुरु हुँदैं गर्दा जनताले सरल र सहजरुपमा सेवा प्राप्त गर्ने विश्वास दिलाउनुभयो ।
कार्यक्रममा बागमती प्रदेशका स्वास्थ्य मन्त्री किरण थापा, काठमाण्डौं उपत्यका मेयर्स फोरमका अध्यक्ष एवम् ललितपुर महानगरपालिकाका प्रमुख चिरीबाबू महर्जनलगायतले सम्बोधन गर्नुभएको थियो ।
