न्यूजअफ, ललितपुर, माघ १२ गते ।
बु. सं. २५६८ औं को नेपाल बौद्ध परियत्ति शिक्षाको तह ४ देखि १० सम्मको परीक्षा आजदेखि शुरु भएको छ । साथै परियत्ति तह १ देखि ३ सम्मको परीक्षा भने फागुन महिनामा संचालन हुनेगरी नियमिततर्फ जम्मा ४३७४ जना परीक्षार्थीहरु परीक्षामा सामेल छन् ।
उपत्यका भित्रका लागि तह ७ देखि १० सम्मका काठमाण्डौ, भक्तपुर र काभ्रेका परीक्षार्थीहरुका लागि परीक्षा केन्द्र वानेश्वरस्थित विश्व शान्ति विहारमा र ललितपुरको भास्सरा मा. वि. पूर्णचण्डीमा ललितपुरका परीक्षार्थीहरुले परीक्षा दिइरहनुभएको जानकारी केन्द्रीय परीक्षा नियन्त्रक भिक्षु बोधिज्ञान महास्थविरले जानकारी दिनुभएको छ ।
त्यस्तै तह ४ देखि ६ सम्मका परीक्षाका लागि ललितपुरमा पूर्वी भेगका परीक्षार्थीहरु ललितपुरको थैनामा रहेको यशोधरा मा.वि. तथा पश्चिम भेगका परीक्षार्थीहरुका लागि भास्सरा मा. वि.लाई परीक्षा केन्द्र तोकिएको छ । काठमाण्डौका लागि भने धर्मकिर्ति विहार काठमाण्डौ, किर्तिपुर, एहिपस्सिको विहार, भक्तपुरमा मुनि विहार, काभ्रेका लागि बनेपा आदि स्थानीय क्षेत्रहरुलाई परीक्षा केन्द्र तोकिएको छ ।
यसका साथै बुटवल, धनकुटा, पाल्पा, सुर्खेत, तनहुँ, कपिलवस्तुलगायतका उपत्यकाबाहिरका क्षेत्रहरु तथा मुलुकबाहिर अमेरिका एवं अष्ट्रेलियामा पनि आजैदेखि परियत्तिका परीक्षा शुरु भएको छ ।
आजदेखि शुरु भएको परीक्षामा तह ४–६ सम्मका परीक्षार्थीहरुले प्रथम पत्र एवं तह ७ – १० सम्मका चौथो पत्रका विषयहरू समावेश छन् ।
तह ७ – १० सम्मका प्रथम, द्वितीय र तृतीय पत्रहरुको परीक्षा गत भदौ–असोज महिना नै भईसकेको छ ।
स्मरणीय रहोस, अखिल नेपाल भिक्षु महासंघद्वारा संचालित नेपाल बौद्ध परियत्ति शिक्षालाई लुम्बिनी विश्वविद्यालयले मान्यता दिइसकेकोले परियत्तिमा कोविद अर्थात तह १० पूरा गरेका विद्यार्थीहरुले लुम्बिनी विश्वविद्यालयमा बुद्ध धर्ममा स्नातकोत्तर तहमा भर्ना हुन सकिन्छ ।
