भक्तपुर, माघ ११
एचपीभी खोप अभियान अन्तर्गत मध्यपुर थिमिका ४ हजार २ सय ३ किशोरीलाई पाठेघरको मुखको क्यान्सरविरुद्ध ‘ह्युमन पापिलोमा भाइरस’ (एचपीभी) खोप लगाइने भएको छ । यहीँ माघ २२ गतेदेखि फागुन ६ गतेसम्म सञ्चालन हुने खोप अभियानमा मध्यपुर थिमिका विद्यालय जाने ४ हजार ७२ र विद्यालय बाहिरका १३१ जना किशोरीहरुलाई एचभीपी खोप लगाइने भएको हो ।
मध्यपुर थिमिमा खोप अभियानका लागि ५६ विद्यालय र १० अन्य स्वास्थ्य संस्थामा केन्द्र तोकिएको छ । अभियानमा एक केन्द्रमा एक स्वास्थ्यकर्मी र दुई जना महिला स्वास्थ्य स्वयम् सेविका परिचालन हुने मध्यपुर थिमि नगरपालिकाको स्वास्थ्य शाखा प्रमुख श्रीकृष्ण प्रजापतिले जानकारी दिनुभयो । जसअनुसार ६६ जना स्वास्थ्यकर्मी र १३२ जना महिला स्वयम् सेविका गरी कुल १९८ जना जनशक्ति परिचालन हुनेछ ।
एचपीभी खोप अहिले अभियानका क्रममा कक्षा ६ देखी १० सम्म अध्ययन गर्ने र विद्यालय बाहिरका १० देखी १४ वर्ष उमेर समूहका किशोरीहरुलाई लगाइदिने कार्यक्रम रहेको जिल्ला जनस्वास्थ्य कार्यालयका प्रमुख शान्तिराम खतिवडाले बताउनुभयो ।
एचभीपी खोप महिलाहरुमा हुने पाठेघरको मुखको क्यान्सरविरुद्धको खोप हो । यो खोप एक पटक लगाए महिलाहरुमा हुने पाठेघरको मुखको क्यान्सरबाट बच्न सकिने विश्व स्वास्थ्य संगठन (डब्ल्युएचओ)मा कार्यरत डा. रमण रञ्जितले बताउनुभयो ।
एचपीभी खोप स्वास्थ्यका दृष्टिले सुरक्षित रहेको डा. रञ्जितले बताउनुभयो । उहाँका अनुसार यो खोप लगाएपछि खोप लगाएको स्थानमा दुख्ने, सुन्निने, रातो हुने, ज्वरो आउने, टाउको दुख्ने, जिउ दुख्ने, रिंगाटा लाग्ने, मांसपेशी दुख्ने, वाकवाकी लाग्ने र वान्ता हुने जस्ता सामान्य लक्षण देखिन सक्छ ।
नेपालमा हरेक वर्ष २ हजार १६९ जना महिलामा पाठेघरको मुखको क्यान्सर हुने अनुमान गरिएको छ । जसमध्ये एक हजार ३ सय १३ जनाको मृत्यु हुने गरेको छ, जुन औसतमा प्रत्येक दिन ४ महिलाको यो रोगका कारण मृत्यु हुने गरेको अनुमान छ ।
महिलाहरुमा हुने क्यान्सर मध्ये पाठेघरको मुखको क्यान्सर दोस्रो स्थानमा रहेको छ भने क्यान्सरबाट महिलाहरुको मृत्यु हुनेमा यो पहिलो स्थानमा रहेको छ ।
मध्यपुर थिमि नगरपालिकाका प्रमुख सुरेन्द्र श्रेष्ठले नगरभित्र क्यान्सरका बिरामी दिनप्रतिदिन बृद्धि भइरहेकोले यस्तो अभियानलाई शतप्रतिशत सफल बनाउन सबैले सहयोग गर्नुपर्ने बताउनुभयो । नयाँ नयाँ अभियानमा अशिक्षितहरुले भन्दा पनि शिक्षित र जाने बुझेकाहरुले नै बढी आशंका गर्ने गरेको बताउँदैं उहाँले त्यस्ता आशंकाहरुलाई चिरेर अघि बढ्न जरुरी रहेको धारणा राख्नुभयो ।
