भक्तपुर, माघ १०
भक्तपुर नगरपालिकाको वडा नं. १० स्थित बेखालमा स्वास्थ्य सेवा केन्द्र सञ्चालनमा आएको छ । नगरपालिकाले वडा वडामा स्वास्थ्य सेवा पुर्याउने नीति अनुसार वडा नं. १० मा बिहिवारबाट बेखाल स्वास्थ्य सेवा केन्द्र सञ्चालनमा ल्याएको हो ।
केन्द्रमा सामान्य स्वास्थ्य जाँच, ल्याव र आवश्यक औषधीलगायतको सुविधा रहेको छ । केन्द्र हाललाई दैनिक दिउँसो ३ बजेदेखी साँझ ६ बजेसम्म सञ्चालन गरिने ख्वप अस्पतालका निमित्त मेडिकल डाइरेक्टर डा. मजेशप्रताप मल्लले जानकारी दिनुभयो । केन्द्रमा आगामी दिनमा विशेषज्ञ सेवा थप गर्दै लाने योजना रहेको उहाँले बताउनुभयो ।
ख्वप अस्पताल भक्तपुर नगरपालिकाले सञ्चालन गरेको नगर अस्पताल हो । केन्द्र नगर अस्पताल मातहत सञ्चालन हुने भएकाले बिरामीलाई थप उपचार आवश्यक परे केन्द्रले ख्वप अस्पतालमा रिफर गर्न सकिने व्यवस्था गरिएको छ ।
स्वास्थ्य बीमा बोर्डले ख्वप अस्पताललाई २५ करोड रुपैंया भन्दा बढी भुक्तानी गर्न बाँकी रहेकोले अस्पताल सञ्चालन र व्यवस्थापनमा समेत समस्या भएको डा. मल्लले बताउनुभयो ।
केन्द्रको उद्घाटन गर्दै प्रतिनिधिसभा सदस्य प्रेम सुवालले नगरपालिकाद्वारा सञ्चालित स्वास्थ्य सेवा केन्द्र जनताको साझा संस्था भएकोले यसको संरक्षण र संवद्र्धनमा जनताको सहभागिता आवश्यक भएको बताउनुभयो ।
भक्तपुर नगरपालिकाका प्रमुख सुनिल प्रजापतिले नगरपालिकाले हालसम्म ६ वटा वडामा स्वास्थ्य सेवा केन्द्र सञ्चालन गरिसकेको जानकारी दिनुभयो । स्वास्थ्य क्षेत्रमा भक्तपुर नमुनाको रुपमा विकास भइरहेको बताउँदै उहाँले सरकारले सामुदायिक र सरकारी अस्पतालबाट मात्र स्वास्थ्य बीमा कार्यक्रम सञ्चालन गर्नुपर्नेे धारणा व्यक्त गर्नुभयो ।
सो अवसरमा सांसद सुवाल र नगर प्रमुख प्रजापतिलगायतले बेखाल स्वास्थ्य केन्द्रको स्थलगत अवलोकन पनि गर्नुभएको थियो ।
