भक्तपुर, माघ ९
काठमाण्डौं उपत्यका अपराध अनुसन्धान कार्यालयको प्रहरीले करिव एक करोड रुपैंया ठगी गरेको अभियोगमा एक युवकलाई पक्राउ गरेको छ । पक्राउ पर्नेमा नुवाकोटको ककनी गाउँपालिका– २ का ३५ वर्षीय कुशल ठकुरी भनिने दिनेश घिमिरे छन् । उनलाई मंगलबार राति १० बजे ठमेलबाट पक्राउ गरेको प्रहरीले जनाएको छ ।
उनले प्रहरीको केन्द्रीय अनुसन्धान ब्यूरो (सीआईबी)को प्रहरीदेखि भन्सारको ऐजेन्टसम्मको नक्कली परिचय दिँदै ठगी गर्ने गरेको काठमाण्डौं उपत्यका अपराध अनुसन्धान कार्यालयका सूचना अधिकारी एसपी काजिकुमार आचार्यले बताउनुभयो ।
एसपी आचार्यका अनुसार पक्राउ परेका दिनेशले त्रिभुवन अन्तर्राष्ट्रिय विमानस्थलको भन्सारमा आएका सुन, आइफोन छुटाउनेदेखि भन्सारले लिलाम गर्न लागेका स्कर्पियो, क्रेटा गाडीहरू समेत सस्तोमा मिलाइदिने भन्दै ठगी गरेको खुलेको छ ।
“विश्वासमा पारेपछि उनले आफ्नो बैंक खातामा रकम हाल्न लगाएर एक करोड रुपैयाँ बढी ठगी गरेको खुलेको छ,” एसपी आचार्यले भन्नुभयो । प्रहरीमा दिनेश विरुद्ध ठगीका ११ वटा उजुरी छन । ठगीको उजुरीका आधारमा गत असोज २० गते उनीविरुद्ध काठमाडौं जिल्ला अदालतबाट पक्राउ पुर्जीसमेत जारी भएको थियो । यो भन्दाअघि ठगी तथा बैंकिङ कसुर गरी उनीविरुद्ध ९ वटा मुद्दा दर्ता भएको पाइएको एसपी आचार्यले जानकारी दिनुभयो ।
