भक्तपुर, माघ ४
भक्तपुरको मध्यपुर थिमि–१ लोहकिल्थलीस्थित मनोहरा खोलामा शुक्रवार एक जना मृत फेला परेका छन । लोहकिल्थलीस्थित वि पि आँखा अस्पताल नजिक मनोहरा खोलामा सुनसरीको भोक्राहा नरसिंह गाउँपालिका–४ घर भई हाल मध्यपुर थिमि नगरपालिका–२ सानोथिमि डेरा गरी बस्ने ४५ वर्षिय लेल्का उराउ मृत अवस्थामा फेला परेको हो ।
मनोहरा खोलामा पुरुष व्यक्ति मृत अवस्थामा रहेको भन्ने जानकारी प्राप्त भएपछि प्रहरी वृत्त थिमिको टोली घटनास्थल पुगेर अनुसन्धान शुरु गरेको थियो । अनुसन्धानको क्रममा मृतकका छोरा १८ वर्षिय समिर उराउले सनाखत गरी मृतक आफ्नो बुवा भएको बताएको जिल्ला प्रहरी परिसर भक्तपुरका सूचना अधिकारी डिएसपी ढुण्डीराज नेउपानेले जानकारी दिनुभयो । मृतकको शब पोष्टमार्तमको लागि केएमसी अस्पताल दुवाकोटमा राखिएको छ ।
मृतक लेल्का गत पुस २२ गतेदेखी परिवारसँग सम्पर्क विहिन थिए । प्रहरीका अनुसार ज्याला मजदुरी गर्ने र सधै मादक पदार्थ सेवन गरी हिँड्ने लेल्का बेलाबेलामा परिवारसँग सम्पर्क विहिन भई दुई चार दिनपछि आफैं डेरामा आउने गरेको अनुसन्धानमा खुलेको छ ।
शरीरमा कुनै चोटपटक नभएको र मृतकको मादक पदार्थ सेवन गरी हिँड्ने बानीका कारण आफैं खोलामा लड्न गई मृत्यु भएको हुन सक्ने देखिएको प्रहरीले जनाएको छ । घटनाको सम्बन्धमा थप अनुसन्धान कार्य भइरहेको डिएसपी नेउपानेले बताउनुभयो ।
