भक्तपुर, माघ १
खो खो विश्वकपमा नेपाल भारतसँग पराजित भएको छ । पहिलो पटक आयोजना भएको खो खो विश्वकपको पुरुषतर्फको पहिलो खेलमा नेपाल भारतसँग प्रतिस्पर्धात्मक खेलमा ३ अंकले पराजित भएको हो ।
नयाँ दिल्लीस्थित इन्धिरा गान्धी इन्डोर हलमा सोमबार राती भएको उद्घाटन खेलमा नेपाल भारतसँग ४२–३९ ले पराजित भएको हो । समूह ए मा रहेको नेपालले दोस्रो खेल मंगलबार पेरुसँग खेल्नेछ ।
भारतले सबै ४२ अंक अट्याकबाट जोड्दा नेपालले ३८ अंक अट्याकबाट र १ अंक डिफेण्डबाट जोडेको थियो ।
पहिलो टर्नमा अट्याक गरेको भारतले २४ अंक जोडेको थियो । त्यसपछि टर्न टु मा नेपालले अट्याक गर्दै २० अंक जोड्यो । टर्न थ्री मा भारतले अट्याकबाट १८ अंक जोड्दा नेपालले डिफेण्डबाट १ अंक जोडेको थियो । टर्न फोरमा नेपालले अट्याकबाट १८ अंक जोडेको थियो ।
कप्तान तथा ‘वजीर’ प्रतीक वैकरको नेतृत्वमा भारतले सानदार प्रदर्शन ग¥यो । भारतले उत्कृष्ट सुरुआत गरेको थियो । पहिलो टर्नको ६० सेकेन्डभित्रै नेपालका तीन डिफेन्डर आउट भएका थिए । प्रतीक र रामजी कश्यपले पहिलो टर्नमा तीन मिनेट बाँकी रहँदा नेपालका दुई ब्याच डिफेन्डरलाई आउट गर्दै १४ अंकको ठूलो अग्रता दिलाए ।
प्रतीकलाई प्रतिस्थापन गरेका सचिन भार्गोले उत्कृष्ट प्रदर्शन देखाए । उनले एक सानदार स्काइडाइभ गर्दै ब्रेकमा भारतको टच अंकलाई २४ मा पु¥याए, जसले नेपाललाई ‘ड्रिम रन’ (तीन मिनेटमा डिफेन्डर म्याटमा रहिरहने अवस्था) हासिल गर्नबाट रोक्यो ।
नेपालले दोस्रो टर्नमा ६ अंक बनाउन लगभग दुई मिनेट लगायो । तर, बलियो पुनरागमन गर्न सफल रह्यो । भारतीय डिफेन्डरले ‘ड्रिम रन’ हासिल गर्न सकेनन्, जसका कारण नेपालले आफ्नो पालोमा २० अंक जोडेको थियो । नेपालका अलराउन्डर जोगेन्द्र राणा मुख्य आक्रामक बने । उनले दुई डाइभसहित चार अंक जोडे, जसले नेपाललाई खेलमा फर्कायो ।
खो खो विश्वकप २०२५ को पहिलो ‘ड्रिम रन’ नेपालका भरत सारुले हासिल गरे । तर, यो जितका लागि पर्याप्त भएन । भारतले चौथो टर्नमा २१ अंकको अग्रता लियो । चौथो टर्नमा नेपालका झलक विकले उत्कृष्ट प्रदर्शन गरे । उनले भारतसँग अंकअन्तर पाँचमा झार्न सफल भएका थिए । तर, यो अन्तिम प्रयास पनि भारतलाई प्रभावशाली जित हासिल गर्न उनले रोक्न सकेनन् ।
पहिलो खो खो विश्वकपमै नेपालबाट महिला र पुरुष दुवै टोलीले सहभागिता जनाएको छ। पुरुषतर्फ समूह ‘ए’ मा भारत र नेपालसँगै भुटान, ब्राजिल र पेरु छन् । महिला र पुरुष दुवैमा सहभागी टोलीलाई चार–चार समूहमा विभाजन गरिएको छ । महिला र पुरुष दुवैमा समूह चरणको खेलपछि चारै समूहबाट शीर्ष दुई टोली क्वार्टरफाइनलमा प्रवेश गर्नेछन् । दुवैतर्फको फाइनल खेल १९ जनवरीमा हुनेछ ।
