भक्तपुर, पुस २६
चाँगुनारायण नगरपालिकाले चालु आर्थिक वर्षको पहिलो ६ महिनामा १३ करोड राजश्व संकलन गरेको छ । चाँगुनारायण नगरपालिकाको शुक्रवार सम्पन्न नगरसभाको १६ औं अधिवेशनमा अर्धवार्षिक प्रगती विवरण प्रस्तुत गर्दै नगर उपप्रमुख रमेश बुढाथोकीले सो जानकारी दिनुभएको हो ।
उहाँका अनुसार पुस २४ गतेसम्म नगरपालिकाले १३ करोड ७ लाख ३७ हजार ५ सय रुपैंया राजश्व संकलन गरेको छ । जुन लक्ष्यको ३५ दशमलव ६ प्रतिशत हो । चाँगुनारायणले चालु आ.व.मा नगरपालिकाले ३६ करोड ६७ लाख २० हजार रुपैंया राजश्व संकलन गर्ने लक्ष्य राखेको नगर उपप्रमुख बुढाथोकीले जानकारी दिनुभयो ।
यसैगरी चाँगुनारायणले चालु आ.व.को ६ महिनामा कुल बजेटको १६ दशमलव ३७ प्रतिशत खर्च गरेको छ । चाँगुनारायणको चालु आ.व.को कुल विनियोजित बजेट २ अर्व १२ करोड ३० लाख ९३ हजार ६ सय रुपैंया रहेकोमा पुस अन्तिम सातासम्म ३४ करोड ७७ लाख ३० हजार रुपैंया मात्र खर्च भएको उपप्रमुख बुढाथोकीले बताउनुभयो ।
उहाँका अनुसार चालु तर्फ ३१ दशमलव १ प्रतिशत खर्च भएको छ भने पुँजीगत खर्च जम्मा ६ दशमलव ४१ प्रतिशत मात्र भएको छ । चालु तर्फ ९३ करोड ७६ लाख २१ हजार ५ सय रुपैयाँ विनियोजन भएकोमा ३१ करोड १६ लाख ५५ हजार ३ सय खर्च भएको छ ।
यस्तै पुँजीगत तर्फ १ अर्व १८ करोड ५४ लाख ७२ हजार रुपैंया विनियोजन भएकोमा हालसम्म ७ करोड ६०. लाख ७५ हजार ५ सय रुपैंया खर्च भएको छ ।
नगरपालिकालाई वित्तीय जोखिम न्यूनीकरण तथा सुशासनयुक्त नगरपालिकाको रुपमा पहिचान गराउन कार्यसम्पादनमा उत्कृष्टता हासिल गर्ने उद्देश्यले उप–प्रमुख बुढाथोकीले स्थानीय तह वित्तीय सुशासन जोखिम मूल्याङ्कनमा ९४ अंक र स्थानीय तह संस्थागत क्षमता स्वमूल्याङ्कन (लिजा) तर्फ ९२.५ अंक दावी सहित नगरपालिकाको प्रारम्भिक नतिजा जिल्ला समन्वय समितिको कार्यालयमा अनुमोदनका लागि पेश गरिएको जानकारी दिनुभयो ।
चाँगुनारायण नगरपालिका न्यायिक समितिमा हालसम्म कुल ४४ वटा विभिन्न प्रकृतिका मुद्दा दर्ता भएको जानकारी दिँदैं उहाँले दुबै पक्षलाई राखी छलफल गराई पक्षहरुको मन्जुरी र संयुक्त निवेदनको आधारमा २ बटा निवेदनहरुमा मिलापत्रद्वारा विवाद समाधान गरिएको बताउनुभयो ।
यसैगरी छलफलबाट मेलमिलाप हुन नसकेका एक वटा निवेदनको निर्णय गरी निरुपण गरिएको छ भने दुवै पक्षले तारेख छोडी लामो समय सम्म अनुपस्थित रहेका विभिन्न ७ बटा निवेदनको कारवाहीलाई तामेलीमा राखिएको छ । हाल समितिमा ३० वटा निवेदनहरुको कारबाही भइरहेको छ । यस्तै ४ वटा निवेदनहरु अदालत पठाउने गरी आदेश भएका छन् ।
नगर प्रमुख जीवन खत्रीको अध्यक्षतामा सम्पन्न अधिवेशनले नगरपालिकाको अर्धवार्षिक समिक्षा प्रतिवेदन, विनियोजन ऐन २०८१ लाई संशोधन गर्न बनेको विधेयक लगायत विभिन्न विधेयकहरु र सार्वजनिक महत्वका प्रस्तावहरु सर्वसम्मत रुपमा पारित गरेको छ ।
सभामा विधायन समितिका संयोजक जयन्द्र खडकाले जग्गा विकास (प्लानिङं) तथा हाउजिङ निर्माण सम्बन्धी विधेयक र सामाजिक विकास समितिका संयोजक जनक खत्रीले खानेपानी ब्यवस्थापन बोर्ड ऐन २०७७ को संशोधन विधेयक पेश गर्नु भएको थियो । ती विधेयक दफावार छलफलपछि सर्वसम्मतले पारित गरिएको थियो ।
यस्तै न्यायिक समितिका सदस्य सुरेश कार्कीले अनुमोदनको लागि सभासमक्ष पेश गर्नु भएको मेलमिलापकर्ताहरुको सुची पनि सर्वसम्मतले पारित गरेको नगर प्रवक्ता एवम् वडा नं. ८ का वडाअध्यक्ष जनक खत्रीले जानकारी दिनुभयो ।
सभाले विभिन्न सार्वजनिक महत्वका विषयमा पनि छलफल गरि महत्वपूर्ण निर्णय गरेको छ । सभाले नगरकोट–कमलविनायक सडकसहित वडा कार्यालय जोड्ने सडक स्तरोन्नतिका लागि विभिन्न १५ वटा योजनाहरुको बजेट सुनिश्चित गरि बुहवर्षिय ठेक्कामार्फत निर्माण गर्ने निर्णय समेत गरेको छ ।
