भक्तपुर, पुस २४
भक्तपुर क्षेत्र नं. २ का प्रतिनिधि सभा सदस्य दुर्लभ थापाले नकारात्मक दृष्टिकोणबाट मात्र समाचार नदिन पत्रकारहरुलाई सुझाव दिनुभएको छ । नेपाल पत्रकार महासंघ जिल्ला शाखा भक्तपुरको २८ औं स्थापना दिवसका अवसरमा मंगलवार आयोजित कार्यक्रममा सांसद थापाले पत्रकारहरुले समाजलाई सकारात्मक सन्देश प्रवाह गर्नुपर्ने बताउँदैं नकारात्मक समाचार मात्र नदिन दिनुभएको हो ।
उहाँले सकारात्मक समाचार बनाउन पत्रकारले कन्जुस्याई गर्दा देशमा असन्तुष्टि बढेको गुनासो समेत गर्नुभयो । उहाँले फोटोमा देखेको र क्षणिक भ्रमणमा हेरेको जस्तो विदेश राम्रो नभएको भन्दै त्यो भन्दा नेपाल धेरै राम्रो भएपनि समाचारहरुले त्यसलाई उजागर गर्न नसकेका कारण नेपालमा निराशा र असन्टुष्टि बढेको जिकिर गर्नुभयो ।
उहाँले शिलान्यास भएर पनि पत्रकार महासंघको भवन निर्माण नहुनु दुःखद भएको बताउँदैं भवन निर्माणका लागि व्यक्तिगत रुपमा ५० हजार आर्थिक सहयोग गर्ने प्रतिवद्धता व्यक्त गर्नुभयो । उहाँले महासंघ जिल्ला शाखा स्थापनामा जोडिएको नाताले महासंघको सधैं माया लाग्ने गरेको पनि बताउनुभयो ।
महासंघ सबै पत्रकारको साझा केन्द्र हुनुपर्नेमा जोड दिंदै उहाँले नेतृत्व चयन संगै प्रतिस्पर्धा बिर्सिएर एकतावद्ध भै अघि बढ्न सुझाव दिनुभयो । “अधिवेशनबाट कार्यसमिति चयन लोकतान्त्रिक अभ्यास हो, निर्वाचनको विषय बिर्सिएर अघि बढ्नुपर्छ,” उहाँले भन्नुभयो ।
सांसदको काम, कर्तव्य र अधिकार बारे आफु पूर्णरुपमा जानकार रहेको बताउँदैं सांसद थापाले आफ्नो पालामा विकास भएन भन्नेहरुलाई टेप लिएर सडक नाप्न चुनौती दिनुभयो । जनप्रतिनिधिको व्यक्तिगत जीवन नै नहुने जस्तो भएको प्रति चिन्ता व्यक्त गर्दै उहाँले आफ्नो स्वास्थ्य प्रतिकुलताका बाबजुद पनि आफू हरक्षण जनताको काममै व्यस्त रहेको बताउनुभयो ।
कार्यक्रममा शाखाका अग्रज पत्रकार एवं देशान्तर साप्ताहिकका सम्पादक कविर राणा लोकतन्त्रसँग प्रेस तथा अभिव्यक्ति स्वतन्त्रतासँग पनि जोडिएर आउने भएकाले महासंघ सधैं लोकतन्त्रको पक्षमा हुनुपर्नेमा जोड दिनुभयो ।
यसैगरी नेपाल पत्रकार महासंघ उपत्यका समितिका अध्यक्ष टेनिस रोकाले विगतमा भक्तपुर शाखाले वैधानिकता गुमाउने संघारमा पुगेको महासंघको रक्षा गर्न र पत्रकारका श्रमजिवि र साना लगानीका पत्रपत्रिकाको पक्षमा नेतृत्वदायी भूमिका खेलेको स्मरण गराउनुभयो ।
कार्यक्रममा नेपाल पत्रकार महासंघ काठमाण्डौं अध्यक्ष शोभा अर्याल, ललितपुर अध्यक्ष रामहरि कार्की, नेपाल प्रेस युनियन भक्तपुर अध्यक्ष रोशन सिल्पकार, प्रेस सेन्टर नेपालका अध्यक्ष मदन ढुंगाना, प्रेस चौतारी नेपालका उपाध्यक्ष ऋषिकेश श्रेष्ठ, समाजवादी प्रेस संगठन नेपालका अध्यक्ष दिनेश कार्की, जनपत्रकार संगठनका पुष्पाकुमारी साउद, अग्रज पत्रकार प्रा. डा. जगत नेपाल लगायतले शुभकामना दिनुभएको थियो ।
शाखाका अध्यक्ष सुन्दर शिल्पकारको सभापतित्वमा सम्पन्न कार्यक्रममा नेपाल पत्रकार महासंघ उपत्यका प्रदेश समितिका कोषाध्यक्ष संजीप घिमिरे शुभचिन्तक, शाखाका सल्लाहकार एवम् पुर्वअध्यक्षद्वय जगतकृष्ण प्रजापति र पुस्करराज बुढाथोकी, पूर्व अध्यक्षहरु नारायण सुन्दर किलम्बू र अमर भुजू लगायतको सहभागिता रहेको थियो ।
पत्रकार रमेश खड्का संस्थापक अध्यक्ष भएर २०५४ सालमा स्थापना गरिएको भक्तपुर शाखा त्यसयता विकल प्रसाद श्रेष्ठ, नारायणसुन्दर किलम्बु, अमर भुजू, पुष्कर बुढाथोकी र जगत प्रजापति हुँदै हाल सुन्दर शिल्पकारको नेतृत्व रहेको छ ।
विगतमा स्थापना दिवसका दिन शाखाले पत्रकारलाई विभिन्न पुरस्कार प्रदान गर्ने गरेको भएपनि यसपटक नयाँ नेतृत्व पदस्थापन भएको एक साता मात्रै भएको कारण सो कार्य गर्न भने नसकिएको सचिव दिपक ढुङ्गानाले जानकारी दिनुभयो ।
