भक्तपुर, पुस २४
नक्कली सीआईबी बनेर भक्तपुरको सानो थिमिबाट दिउँसै आधा किलो सुन लुटपाट गरेको आरोपमा प्रहरीले तीन जनालाई गत पुस १९ गते पक्राउ गरेको छ । लुटपाटका योजनाकार दुई जना भने अझै फरार छन । उनीहरुको खोजी भइरहेको प्रहरीले जनाएको छ ।
पक्राउ पर्नेहरुमा नुवाकोटको पञ्चकन्या गाउँपालिका–१ घर भई काठमाण्डौं टोखा नगरपालिका–१ झोर बस्ने २६ वर्षीय सुजन नेपाली, सिन्धुपाल्चोकको चौतारा साँगाचोकगढी नगरपालिका–३ घर भई काठमाण्डौं गोकर्णेश्वर बस्ने ३२ वर्षीया अनिता तामाङ भनिने मिनसाङ लामा तामाङ र काभ्रेको तेमाल गाउँपालिका–१ घर भई काठमाण्डौं महानगरपालिका–६ बस्ने २२ वर्षीय लालबहादुर तामाङ रहेका छन ।
अनुसन्धानको क्रममा पक्राउ परेका सुजन नेपाली पूर्व प्रहरी भएको खुलेको छ । प्रहरी वृत्त महाराजगञ्जमा कार्यरत नेपालीले तीन महिना अघिमात्र जागिरबाट राजीनामा दिएको पाईएको काठमाण्डौं उपत्यका अपराध अनुसन्धान कार्यालयका सूचना अधिकारी एसपी काजिकुमार आचार्यले बताउनुभयो । पक्राउ परेकी अनिताले महिला प्रहरीको भूमिका निभाएकी थिइन् ।
प्रहरीका अनुसार लुटपाट गर्ने समूहले गत पुस १४ गते भक्तपुरको सानो थिमि चोकबाट दुवईबाट आएकी एक महिलाको करिव आधा किलो सुन लुटपाट गरेको हो । सो समूहले नक्कली सीबीआई बनेर १४ पुसको आइतबार दिउँसो साढे २ बजे फ्लाई दुबईको विमानबाट त्रिभुवन अन्तार्राष्ट्रिय विमानस्थलमा ओर्लिएका ती महिलाले लगाइको स्यानिटरी प्याडमा रहेको आधा किलो सुन लुटपाट गरेका थिए ।
घटना विवरण अनुसार प्रहरीले भक्तपुर ‘क’ उपनाम दिएकी महिला पुस १४ गते दुवईबाट दिउँसो साढे दुई बजे त्रिभुवन अन्तार्राष्ट्रिय विमानस्थलमा ओर्लिएका थिए । उनी विमानस्थलको सुरक्षा जाँच पास गर्दै बाहिरिएर ट्याक्सी चढेर भक्तपुर आउँदै थिइन । उनी चढेको ट्याक्सीलाई सानो थिमि चोकमा पुगेपछि त्यही प्रहरी प्रभागमा कार्यरत रही सडकमा ड्युटी गरेको प्रहरीले रोके । ट्याक्सी रोकेपछि सक्कली प्रहरीसँगै रहेका दुई युवा र एक युवतीको समूहले दुबईबाट आएकी भक्तपुर ‘क’लाई तुरुन्तै आफ्नो शरीरमा लगाएको स्यानिटरी प्याड झिकेर दिन आग्रह गरे ।
ती तीन युवायुवतीले आफूहरू केन्द्रीय अनुसन्धान ब्यूरो (सीआईबी)को प्रहरी भएको बताउँदैं विश्वास दिलाउन प्रहरी परिचय पत्र समेत देखाएको थियो । सीआईबीको प्रहरी बताउँदै तुरुन्तै यौनाङ्गमा लगाइएको स्यानिटरी प्याड दिन धम्की दिएपछि भक्तपुर ‘क’ डराइन् । त्यसपछि उनले आफूले लगाएको प्याड ट्याक्सीभित्रै खोलेर प्रहरी बताउने समूहलाई दिइन् । त्यसपछि ट्याक्सीबाट झारेर भक्तपुर ‘क’लाई समेत लिएर तीन युवा युवतीको हिँडे ।
तीन जनाको समूहले महिलालाई लिएर गए लगत्तै सडकमा ड्युटीमा बसेर ट्याक्सी रोक्न मद्दत गरेका प्रहरी प्रभाग सानो थिमिा प्रहरीले घटनाबारे माथिल्लो निकायलाई जानकारी गराए ।
घटनाबारे जानकारी पाएपछि घटना शंकास्पद भएको भन्दै जिल्ला प्रहरी परिसर भक्तपुर र परिसर भक्तपुरमै रहेको काठमाण्डौं उपत्यका अपराध अनुसन्धान कार्यालयको (पीआरसीबी) को टोलीले संयुक्त रुपमा अनुसन्धान अघि बढायो । “घटनाको विश्लेषण गर्दा शंकास्पद देखिएपछि अनुसन्धान अघि बढाइयो । प्रहरीले ट्याक्सी नम्बर र परिचयपत्रको नाम समेत याद गरेकाले अनुसन्धानमा थप सहज भयो,” एसपी आचार्य भन्नुभयो ।
त्यसपछि प्रहरीले महिलाले यौनाङ्गमा लगाएको स्यानिटरी प्याड लुट्ने तीन जनाको पहिचान गरेको थियो । घटनाको चार दिनपछि १९ पुसमा प्रहरीले स्यानिटरी प्याड लुटेको आरोपमा काठमाण्डौं उपत्यकाका विभिन्न ठाउँहरूबाट तीन जनालाई पक्राउ गर्न सफल भएको हो ।
उनीहरू पक्राउ परेपछि बल्ल स्यानिटरी प्याड लुट्नुको रहस्य खुलेको हो । सुन गालेर लिक्वीड बनाएर उक्त प्याडमा लेपन लगाइएको खुल्यो । स्यानिटरी प्याडमा सुनको लिक्वीड दलेपछि ती महिलाले उक्त प्याड लगाएर दुबईदेखि आएको खुल्यो । पक्राउ परेकाहरूको डेराकोठा खानतलासी गर्दा झण्डै आधा किलो (४३६.१० ग्राम) सुन बरामद भएको काठमाण्डौं उपत्यका अपराध अनुसन्धान कार्यालयका एसएसपी सानुराम भट्टराईले बताउनुभयो ।
घटनामा संलग्न तीन जना पक्राउ परे पनि घटनाका मूख्य योजनाकारहरु दुई जना भने पक्राउ पर्न सकेको छैन । यस्तै स्यानिटरी प्याडमा सुन लुकाएर ल्याउने महिला पनि पक्राउ परेको छैन भने सुन कसको हो, कसले कसलाई दिन पठाएको हो त्यो पनि खुल्न बाँकी रहेको प्रहरीले जनाएको छ ।
लुटपाटका योजनाकार तथा सुन ल्याउने भरिया महिला पक्राउ नपरिकन यो सुनको वास्तविकता खुल्न नसक्ने एक अनुसन्धान अधिकृत बताउँछन् । लुटपाटको आरोपमा पक्राउ परेकाहरूले आफूलाई महिलाले स्यानिटरी प्याडमा लुकाएर सुन ल्याएको भन्ने बोहक अन्य कुराहरू थाहा नभएको बताएका छन् । सुन बोकेर आउने महिलाको पहिचान भए पनि प्रहरीले पक्राउ गर्न सकेको छैन ।
अनुसन्धानको क्रममा फरार रहेका दुई जनाले हाल पक्राउ परेका तीन जनालाई प्रयोग गरेर सुन लुटिएको खुलेको छ । लुटपाटका मुख्य योजनाकारहरूको सुन तस्करको समूहसँग कनेक्सन भएको हुन सक्ने प्रहरीले आशंका गरेको छ । सुन तस्करको समूहले दुबईबाट ती महिलालाई प्रयोग गरेर सुन बोकाएर पठाएको सूचना लुटपाटका योजनाकारहरूले पाएको र त्यसपछि लुट्नका लागि व्यक्ति खटाएको हुनसक्ने आशंका प्रहरीको छ ।
प्रहरीका अनुसार घटना भएको दुई साता हुन लाग्दा समेत लुटपात भएको सुनको खोजी गर्न र सुन लुटिएको भन्दै कोही पनि प्रहरीमा आएको छैन । प्रहरीले आफ्नै सूचना संयन्त्रमार्फत अनुसन्धान गरेर लुटिएको सुन बरामद गरेको हो ।
पक्राउ परेका तीनै जनालाई प्रहरी पसिर भक्तपुरको नियन्त्रणमा राखी ठगी र संगठित अपराधको कसुरमा भक्तपुर जिल्ला अदालतबाट म्याद थप गरी अनुुसन्धान अघि बढाइएको छ । पुस १९ गते पक्राउ परेका तीनै जनालाई अनुसन्धान अघि बढाउन अदालतले पहिलो पटक सोही दिन ५ दिनको म्याद दिएको थियो ।
प्रहरीले आज बुधवार दोस्रो पटक म्याद थपको लागि अदालत लैजाने प्रहरी परिसर भक्तपुरका सूचना अधिकारी डिएसपी ढुण्डीराज नेउपानेले जानकारी दिनुभयो । अहिले ठगी र संगठित अपराधमा अनुसन्धान भइरहेको र यताको अनुसन्धान सकिएपछि पक्राउ परेकालाई सुन सहित भन्सारमा बुझाइने जानकारी दिँदैं उहाँले भन्सारमा बुझाए पछि भन्सार ऐन अनुसार पनि थप कारवाही हुने बताउनुभयो ।
