भक्तपुर, पुस १७
सांस्कृतिक, ऐतिहासिक र पुरातात्विक महत्वको चाँगुनारायण नगरपालिकाले यही पुस २० गते वडा नं. ९ ताथलीमा वागमती प्रदेशस्तरीय प्रथम धिमे बाजा प्रतियोगिता गर्ने भएको छ ।
नगरकोट भ्रमण वर्ष–२०८२ लाई लक्षित गरि ताथलीको ताथली फाँटमा सो धिमे प्रतियोगिता आयोजना गर्न लागिएको चाँगुनारायण नगरपालिकाका प्रमुख जीवन खत्रीले बताउनुभयो ।
“चाँगुनारायण नगरपालिकामा रहेका मूर्त– अमूर्त सम्पदा संरक्षण र प्रवद्र्धनमा सहयोग पुर्याउन तथा नगरपालिकाले आगामी २०८३ सालमा गर्न लागेको नगरकोट भ्रमण वर्षलाई वडा तहसम्म पुर्याउनका लागि वडा नं . ९ मा धिमे बाजा प्रतियोगिता गर्न लागेका हौं,” उहाँले भन्नुभयो, “नगरकोट भ्रमण वर्षको पूर्वसन्ध्यामा हुने यो प्रतियोगिताले नगरकोट भ्रमण वर्षको प्रचारप्रसार गर्न पनि सहयोग पुग्नेछ ।”
नगरपालिकाले उक्त प्रतियोगिताका लागि वडा नं. ९ स्तरीय व्यवस्थापन समिति पनि गठन गरिएको उहाँले जानकारी दिनुभयो ।
सो प्रतियोगितामा विजेता टोलीलाई नगद रू. ५० हजार पुरस्कारसहित शिल्ड, १ थान धिमे बाजा, २ थान भुछ्या र सिछ्या प्रदान गरिनेछ भने द्वितीयलाई २५ हजार नगदसहित शिल्ड र प्रमाणपत्र एक थान धिमे, एक थान भुछ्या र एक थान सिछ्या, तृतिय हुनेलाई नगद १० हजारसहित शिल्ड, प्रमाणपत्र, एक थान धिमे र एक थान भुछ्या प्रदान गरिनेछ ।
यस्तै सान्त्वनालाई नगद ५ हजारसहित शिल्ड, प्रमाणपत्र र धिमे एक थान, उत्कृष्ट प्रस्तुति (निर्णायक छनोट)लाई धिमे बाजा १ थान, उत्कृष्ट छैटौंदेखि १० औं स्थानसम्मका लागि भुछ्या १–१ थान र सहभागी प्रत्येकलाई मायाको चिनोको व्यवस्था गरिएको नगर प्रमुख खत्रीले बताउनुभयो ।
चाँगुनारायण नगरपालिका वडा नं. ९ का वडा अध्यक्ष गणेश त्यातको संयोजकत्वमा प्रतियोगिता समन्वय समिति गठन गरिएको सो प्रतियोगितामा सहभागी हुन प्रति समूह दर्ता शुल्क १ हजार रूपैयाँ निर्धारण गरेको छ ।
प्रतियोगितामा नेवारी खाजा तथा खाना फेस्टिभल विशेष आर्कषकको रुपमा रहने आयोजकले जनाएको छ । चाँगुनारायण नगरपालिकाका नगर प्रवक्ता एवम् चाँगुनारायण नगरपालिका वडा नं. ८ का वडा अध्यक्ष जनक खत्रीले धिमे बाजा प्रतियोगिताले समग्र नगरपालिकाको पर्यटन प्रवद्र्धनमा टेवा पुग्ने बताउनुभयो ।
प्रतियोगिताको लागि ११ लाख रुपैयाँको बजेट अनुमानित गरिएको छ । प्रतियोगितामा काठमाण्डौं उपत्यकाका साथै काभ्रे, सिन्धुपाल्चोक, मकवानपुर, दोलखा, नुवाकोट, धादिङ लगायतका जिल्ला र ती जिल्लाका नगरपालिका, गाउँपालिकाबाट गरी करिब ५० वटा टोलीको सहभागिता रहने अपेक्षा आयोजकले गरेको छ ।
