भक्तपुर, मंसिर २९
नेपाल पत्रकार महासंघ जिल्ला शाखा भक्तपुरको अध्यक्षमा सुन्दर शिल्पकार विजयी हुनुभएको छ । महासंघको शुक्रवार सम्पन्न निर्वाचनमा शिल्पकार निवर्तमान अध्यक्ष जगतकृष्ण प्रजापतिलाई पछि पार्दै अध्यक्ष विजयी हुनुभएको हो ।
महासंघको उपाध्यक्षमा हेमराज ढकाल, उपाध्यक्ष महिलामा नविना खर्बुजा श्रेष्ठ, सचिवमा दिपक ढुंगाना, सहसचिवमा दिनेश कार्की, सहसचिव समावेशीमा राजल छुंका (हरि सुन्दर) र कोषाध्यक्षमा रामगोपाल तमखू विजयी हुनुभयो ।
यस्तै कार्यसमिति सदस्यहरु मध्ये महिलामा सिर्जना खतिवडा, खुल्ला सदस्यहरुमा मनोजकुमार फुँयाल, मणिराम लामिछाने, पुष्पा कुमारी साउद, सुदर्शन आचार्य, नारायण थापा, केशव प्रसाद तिमिल्सिना, रामसुन्दर खाइजु, राजकुमार लामिछाने ‘चमत्कार’ विजयी भएका छन ।
आदिवासी जनजाती सदस्यमा निशा कुस्मा र रेणु त्वानाबासुको मत बराबर भएको छ । दलित सदस्यमा अंजिरसिंह विक यसअघि नै निर्विरोध निर्वाचित भएका थिए । केन्द्रीय परिषद् सदस्यमा रमेश गिरी, पेशल आचार्य, पूर्ण दुवाल र जीवन ढुङ्गाना विजय हुुनुभएको निर्वाचन समिति संयोजक केदार खड्काले जानकारी दिनुभयो ।
भक्तपुरमा नेपाल प्रेस युनियन–प्रेस चौतारी नेपालको गठबन्धन र निवर्तमान अध्यक्ष जगतकृष्ण प्रजापतिको नेतृत्वमा प्रेस सेन्टर नेपाल, समाजवादी प्रेस संगठन नेपाललगायतका संगठनले अलग अलग प्यानल बनाएर निर्वाचनमा होमिएका थिए ।
निर्वाचनमा प्रजापति पराजित भएपनि उनको प्यानलले बहुमत ल्याएको छ । निर्वाचित मध्ये महिला उपाध्यक्ष, सचिव, दुई सहसचिव, कोषाध्यक्ष, दलित सदस्य र ३ खुल्ला सदस्य प्रजापतिको प्यानलका हुन भने महिला सदस्यमा मत बराबर भएकाले निर्णय हुन बाँकी रहेको छ ।
