भक्तपुर, मंसिर २२
राष्ट्रिय बी बुद्धिचाल प्रतियोगिताको पुरुषतर्फ उपाधि उदीयमान खेलाडी पुरुषोत्तम सिलवालले जितेका छन । नेपाल बुद्धिचाल महासंघ र भक्तपुर जिल्ला बुद्धिचाल संघको संयुक्त आयोजनामा भक्तपुरमा शनिवार सम्पन्नमा पुरुषोत्तमले ६.५ अंक जोडेर उपाधि जितेका हुन ।
सूर्यविनायक नगरपालिकाको प्रायोजनमा होटल सिटीगाउँमा सम्पन्न ९ चरणको प्रतिष्पर्धामा काठमाण्डौंका युवा पुरुषोत्तमले ४ जीत र ५ बराबर नतिजा आत्मसाथ गर्दै अपराजित रहन पुगे ।
२५ औं राष्ट्रिय प्रतियोगिताको छनोटका रुपमा आयोजित स्पर्धामा समान ६.५ अंक जोडेर दोलखाका आशिष फूँयाल द्वितीय र रौतहटका एफएम रुपेश जैसवाल तृतीय भए ।
पाँच दिन सम्म चलेको प्रतियोगितामा उत्कृष्ट चौथो स्थान देखि नवौं स्थान प्राप्त गर्ने खेलाडीले समान ६ अंक जोडेर राष्ट्रिय खेलमा छनौट हुन सफल भएका छन् । प्रतिस्पर्धा मार्फत सानदार खेल प्रदर्शन गरि भक्तपुरका विनय थापा, ललितपुरका सुरोज महर्जन, काठमाण्डौंका धिरेन राई, सिएम नवीन तण्डुकार, प्रेमकृष्ण महर्जन र एफएम रिजेन्द्र राजभण्डारी २५ औं राष्ट्रिय प्रतियोगिताको छनोट भएका छन ।
प्रतियोगिताका विजेताहरुलाई पुरस्कार वितरण गर्दै सूर्यविनायक नगरपालिका वडा नं. ७ का अध्यक्ष रविन्द्र सापकोटाले स्थानीय निकायले खेलमा लगानी गरी देशको सान बढाउनु पर्ने धारणा राखे । कार्यक्रममा महासंघका महासचिव धर्मबहादुर लामा, पूर्व उपाध्यक्ष रामप्रसाद कासुला, सचिवालय सदस्यद्वय निरञ्जन प्रजापति, राजु ताम्राकार लगायतको उपस्थिति रहेको थियो ।
