भक्तपुर, मंसिर २२
मध्यपुर थिमि नगरपालिकाका प्रमुख सुरेन्द्र श्रेष्ठले भक्तपुर आउने पर्यटकहरु मध्यपुरमा पस्ने र बस्ने वातावारण निर्माण गरिने बताउनुभएको छ । नेपाल प्रेस सोसाईटीले शुक्रबार आयोजना गरेको ‘मध्यपुर महोत्सव–२०८१ बारे नगरप्रमुख सुरेन्द्र श्रेष्ठसँगको अन्तरक्रिया कार्यक्रम’मा उहाँले मध्यपुर ऐतिहासिक र साँस्कृतिक नगर भएकाले पर्यटनको गन्तव्यको रुपमा विकास गर्ने बताउनुभएको हो ।
उहाँले महोत्सवलाई पर्यटन विकासको आधार विन्दूको रुपमा लिएर थप पूर्वाधारको विकास गरी पर्यटनलाई स्थानीय बासिन्दाको आयआर्जनसँग पनि जोडेर लैजाने योजना रहेको बताउनुभयो ।
“मध्यपुर थिमि नगरपालिका काठमाण्डौं उपत्यकाको बिचमा रहेको नगरपालिका हो । यो मुर्त अमुर्त सम्पदाको धनी नगरपालिका हो । यो नगरमा हामीले अहिले आन्तरिक र बाह्य गरी ५ लाख पर्यटक भित्र्याउने लक्ष्य राखेका छौं,” उहाँले भन्नुभयो ।
उहाँले महोत्सवमा स्थानीय मौलिक कला सँस्कृति, नेवारी परिकार, परम्पराष्त पेशा व्यवसाय, पुरातात्विक स्मारक क्षेत्र, परम्परागत खेल, नेवा भ्वय्, स्थानीय जीवनशैली र रहनसहन, साँस्कृति कार्यक्रम, स्थानीय उत्पादनहरुको व्यापारिक प्रदर्शनी र प्राकृतिक एवम् रमणीय पार्कहरुको अवलोकन गर्न सकिने जानकारी दिनुभयो ।
यस्तै प्रमुख आकर्षणको रुपमा टिगनीमा परम्परागत शैलीमा चिउरा कुट्ने प्रविधिको जीवन्त प्रदर्शनी, बोदे र दिगुलीमा जिब्रो छेडेने जात्राको डमी प्रदर्शन, दिगुलीमा ५ फिट अग्लोको माटोको सुकुन्दा प्रदर्शनी, दिगुलीमा माटोको हिटरको ढोका निर्माण, नेवारी सँस्कृतिमा जन्मदेखी मृत्युसम्म र विभिन्न चाडपर्व र अवसरमा खाने भोजको परिकार प्रदर्शन, बालकुमारीमा गेडागुडीको प्रदर्शन, बुद्धको अस्तुधातु, लिच्छवीकालदेखीको नेपाली मुद्रा प्रदर्शनी, दैनिक जीवनमा प्रयोग हुने माटोका भाँडाकुँडाको जीवन्त प्रदर्शनी, नगदेशमा तरकारीको ढोका, लाखेलगायत रहेको र यो थप हुने क्रममा रहेको नगर प्रमुख श्रेष्ठले जानकारी दिनुभयो ।
मध्यपुर थिमि नगरपालिकाले यही पुष १२, १३, र १४ गते ‘मध्यपुर महोत्सव–२०८१’ आयोजना गर्दैछ । महोत्सवमा ले सांस्कृतिक, ऐतिहासिक र पर्यटकीय महत्व झल्काउनेगरी विविध गतिविधि समेट्ने जानकारी दिँदैं नगर प्रमुख श्रेष्ठले महोत्सवले स्थानीय कला, संस्कृति, परम्परा र व्यापारलाई प्रवर्द्धन गर्ने विश्वास व्यक्त गर्नुभयो ।
नेपाल प्रेस सोसाइटीका अध्यक्ष उपेन्द्र केसीको सभापतित्वमा सम्पन्न सो कार्यक्रममा नेपाल पत्रकार महासंघ जिल्ला शाखा भक्तपुरका अध्यक्ष जगतकृष्ण प्रजापति, सचिव संजीप घिमिरे ‘शुभचिन्तक’, नेवाः पत्रकार राष्ट्रिय दवू भक्तपुरका अध्यक्ष रामगोपाल तमखूलगायतको सहभागिता रहेको थियो ।
