भक्तपुर, मंसिर २२
नेपाल बुद्धिचाल महासंघ र भक्तपुर जिल्ला बुद्धिचाल संघको संयुक्त आयोजनामा सञ्चालन भइरहेको नेशनल बी चेस प्रतियोगितामा महिलातर्फको काठमाण्डौंकी बिनिता कपालीले जितेकी छिन ।
यससँगै बिनिताले माघमा हुने १० औं महिला राष्ट्रिय बुद्धिचाल प्रतियोगितामा आफ्नो सशक्त दाबेदारी प्रस्तुत गरेकी छिन् । उनले अन्तिम ७ औं चरणको स्पर्धामा धनुषाकी शान्ति धिमाल माथि जीत दर्ता गर्दै ६.५ अंक जोडेर विजयी बनेकी हुन् ।
यस्तै चितवनकी लक्ष्मी कँडेल ५.५ अंक बनाएर दोश्रो स्थानमा रहन सफल भइन् । उनले पनि राष्ट्रिय प्रतियोगितामा स्थान सुरक्षित बनाएकी छिन । संयुक्त तेस्रो स्थान ओगट्दै छनौट हुने क्रममा नेपालगञ्जकी ईशा गिरी, धनुषाकी शान्ति धिमाल, काठमाण्डौकी दानिशा पुरी, पर्साकी शुशीला गुरुङ, झापाकी पुनम प्रसाईं र काठमाण्डौकी एञ्जल महर्जनले समान ४–४ अंक जोड्न सफल भए ।
काठमाण्डौकी रिया श्रेष्ठ ३.५ अंक जोडेर ९ औं स्थान प्राप्त गर्न सफल भइन् ।रिया सँगै यी ९ खेलाडीले गत राष्ट्रिय प्रतियोगिताका शीर्ष ३ खेलाडी काठमाण्डौकी सिन्दिरा जोशी, झापाकी कृतिसारा अधिकारी र मकवानपुरकी पूजा भण्डारी सँग प्रतिस्पर्धामा गर्नेछन ।
यसैगरी भक्तपुरको बाचमारी स्थित होटल सिटि गाउँ सभाहलमा जारी प्रतियोगितामा ८ औं चरणको खेल पश्चात पुरुष तर्फ काठमाण्डौंका पुरुषोत्तम सिलवाल, दोलखाका आशिष फूँयाल र रौतहटका एफएम रुपेश जैसवाल समान ६ – ६ अंक जोडेर संयुक्त पहिलो स्थानमा रहन सफल भएका छन् ।
काठमाण्डौका धिरेन राई, ललितपुरका सुरोज महर्जन, काठमाण्डौंका एफएम रिजेन्द्र राजभण्डारी, मकवानपुरका सिएम मिलन लामा, भक्तपुरका निकेन कुसाथा समान ५.५ अंक बनाउदै संयुक्त दोश्रो स्थानमा छन् ।
काठमाण्डौका सुरज सिंह, धनुषाका सुशील चौधरी, काठमाण्डौका विनय थापा, सिएम नवीन तण्डुकार र प्रेमकृष्ण महर्जन ५ – ५ अंक बटुल्दै संयुक्त तेस्रो स्थानमा छन् ।
भक्तपुरको सूर्यविनायक नगरपालिकाको प्रमुख प्रायोजनमा सञ्चालन भइरहेको नेशनल बी चेस प्रतियोगितामा ४० जना राष्ट्रिय खेलाडीहरुले छनौटका लागि प्रतिस्पर्धा गरिरहेका छन् ।
पुरुष तर्फ जम्मा ९ जना खेलाडी छनौट भइ गत राष्ट्रिय च्याम्पियन शीर्ष तिन खेलाडी झापाका राजन सुवेदी, शुश्रुत दहाल र मकवानपुरका क्षितिज भण्डारी सँग २५ औं नेपाल च्याम्पियन प्रतिस्पर्धामा स्पर्धा गर्नेछन् ।
