ललिता साह, भक्तपुर, मंसिर ९
बागमती प्रदेशका सामाजिक विकास मन्त्री हरीप्रभा खड्गीले भ्रष्टाचार न्यूनिकरणका लागि शिक्षा र स्वास्थ्य निःशुल्क हुनुपर्ने बताउनुभएको छ । भक्तपुरको दरवार स्क्वायरस्थित श्री पद्म माविको १०१ औं र पद्म कलेको १५ औं वार्षिकोत्सवको अवसरमा शनिवार आयोजित कार्यक्रममा मन्त्री खडगीले सामुदायिक विद्यालयमा नै गुणस्तरीय शिक्षा र स्वास्थ्य सेवा निःशुल्क प्रदान गर्न सके भ्रष्टाचार मुक्त देश निर्माण गर्न सक्ने बताउनुभएको हो ।
उहाँले सामुदायिक विद्यालय अब्बल बनाउँदैं थोरै कमाएर महँगो विद्यालय पढाउनु परेको बाध्यता अन्त्य गर्न बागमती प्रदेशले निःशुल्क रुपमा गुणस्तरीय शिक्षाको निति लिएको बताउनुभयो ।
विश्व अघि बढ्नुमा विज्ञान ÷ प्रविधिको भूमिका रहेको छ । पछिल्लो समय युवाहरू पलायन हुँदै गर्दा देश वृद्धाश्रम तर्फ धकेलिराखेको निराशाको दृश्य छ । युवालाई आफ्नै देशमा राख्न विदेशको आइटी विज्ञान प्रविधि भित्र्याउनुपर्छ, उहाँले भन्नुभयो ।
उहाँले विद्यार्थीहरुको भविष्यका लागि बागमती प्रदेशले ल्याएको पढ्दै कमाउँदै सिक्दै कार्यक्रम प्रदेशको सबै विद्यालयहरूले लागू गर्नुपर्नेमा जोड दिनुभयो । बागमती प्रदेशले प्रादेशिक शिक्षालय संचालनको अवधारणामा काम गरिरहेको बताउँदैं उहाँले पद्म माविको भौतिक पूर्वाधार निर्माणको जिम्मेवारी प्रदेश सरकारको भएकोले त्यसमा लाग्ने बजेट दिने प्रतिबद्धता जनाउनुभयो ।
विद्यालय व्यवस्थापन समितिका अध्यक्ष बाबुराजा जोशीले सभापतित्वमा सम्पन्न समारोहमा प्राचार्य राम हाडाले विद्यालयको वार्षिक शैक्षिक, भौतिक र आर्थिक प्रगति प्रतिवेदन सार्वजनिक गर्नुभएको थियो ।
पद्म मावि २०७३ मा नमुना विद्यालय घोषणा भएको हो । पद्मको कथा उज्यालोको शताब्दी पार गरिरहँदा विद्यालयले नमुना अब्बल र असल अभ्यासहरुमा देशमै अग्रस्थान ओगटेको छ ।
विद्यालय ३१ रोपनी १४ आना बढी जग्गा क्षेत्रफलमा फैलिएको छ । बागमती प्रदेशबाट भौतिक संरचनाको लागि डिपिआर भएर भवन निर्माणको लागि १६ करोड विनियोजन भएपनि हाल बजेट कार्यन्वयन प्रकृया रोकिएकोले प्रदेश सरकारको तर्फबाट सो बजेट निकासाको प्रकृया अघि बढाइदिन प्राचार्य हाडाले मन्त्री खड्कीसँग आग्रह गरेका छन् ।
समारोहमा विद्यालयको आधारभूत तहदेखि स्नातक तहसम्मका उत्कृष्ट विद्यार्थीहरूलाई पुरस्कृत गरिएको थियो भने २० वर्षसम्म विद्यालयमा अनवरत सेवा गरेका शिक्षक तथा कर्मचारीलाई दीर्घसेवा सम्मान प्रदान गरिएको थियो ।
समारोहमा बागमती बागमती प्रदेशका प्रदेश सभा सदस्यहरू विभिन्न पेशागत संघ संगठनका प्रमुखहरू , विद्यालयका पूर्व प्रधानाध्यकहरु , छात्रवृति दाताहरू ,प्रमुख जिल्ला अधिकारी, प्रहरी प्रमुख, पत्रकार , समाजसेवी , राजनितिज्ञ , नागरिक समाज तथा अभिभावकहरुको उपस्थिति रहेको थियो ।
