भक्तपुर, मंसिर ६
भक्तपुरमा नेपाल विद्यालय खेलकुद महासंघको जिल्ला कार्यसमिति गठन गरिएको छ । मध्यपुर थिमि नगरपालिका वडा नं. १ लोहकिल्थलीमा बुधवार भएको एक भेलाले निलेश आचार्यको अध्यक्षतामा महासंघको जिल्ला कार्यसमिति गठन गरिएको हो ।
नवगठित कार्यसमितिको उपाध्यक्षमा विजय कर्माचार्य र मिना महर्जन, सचिवमा सुमन बस्नेत, कोषाध्यक्षमा विना पाण्डे चयन हुनुभएको छ । यस्तै कार्यसमिति सदस्यहरुमा कृष्ण भक्त ङाखुसी, मनोज आचार्य दिक्षित, रुपेश कुमार बिष्ट, राजु प्रजापति, दिनेश पाण्डे र रामबाबु रेग्मी रहेका छन् ।
विद्यालयमा खेलकुद विकासका लागि पहिलोपटक भक्तपुरमा नेपाल विद्यालय खेलकुद महासंघ जिल्ला कार्यसमिति गठन गरिएको नवनिर्वाचित अध्यक्ष आचार्यले बताउनुभयो । उहाँले समितिमा भक्तपुरका नीजि तथा सामूदायिक विद्यालयका प्रतिनिधिहरुको सहभागिता रहेको जानकारी दिनुभयो ।
उहाँले पछिल्लो समय नेपालले क्रिकेट, महिला फुटबल, भलिबललगायतका खेलमा गरेको प्रगती र उपलब्धीलाई निरन्तरता दिन विद्यालयस्तरमा नै खेलकुद गतिविधि बृद्धि हुनुपर्ने खाँचोलाई मनन गरी भक्तपुरमा पनि विद्यालयस्तरमा खेल गतिविधि बृद्धि गरी नयाँ र प्रतिभावान खेलाडीहरु उत्पादन गर्ने उद्देश्यले महासंघको जिल्ला समिति गठन गरिएको जानकारी दिनुभयो
उहाँले तदर्थ समितिको रुपमा गठन गरिएको समितिलाई आगामी दिनमा थप विद्यालय सञ्चालक र प्रधानाध्यापकहरुको सहभागिता गराई सबैलाई समेटेर लैजाने प्रतिवद्धता व्यक्त गर्दै महासंघले भक्तपुरका विद्यालयहरुमा खेलकुदका गतिविधीलाई अझ सकृय र व्यवस्थित लैजाने रहेको योजना रहेको बताउनुभयो ।
यसैबीच महासंघ जिल्ला कार्यसमितिको बुधवार नै बसेको पहिलो बैठकले प्याव्सनका केन्द्रीय सदस्य रहनुभएका चन्द्रकुमार अधिकारी र स्थानीय व्यवसायी किशोर हेकालाई सल्लाहकारमा मनोनयन गरेको अध्यक्ष आचार्यले जानकारी दिनुभयो ।
