भक्तपुर, कार्तिक २८
नेपाल आइसीसी महिला यु–१९ विश्वकप त्रिकेट प्रतियोगिताका लागि छनोट भएको छ । एसियाली छनोट अन्तर्गत बुधवार संयुक्त अरब इमिरेट्स (युएई)को अजमानमा सम्पन्न अन्तिम खेलमा घरेलु टोली युएईमाथि ८ विकेटको ऐतिहासिक जित निकाल्दै नेपाल यु–१९ विश्वकपमा छनोट भएको हो ।
नेपालले ६ खेलबाट १० अंक जोड्यो । युएईले पनि ६ खेलबाट १० अंक नै जोडे पनि नेपाल नेट रनरेटमा अगाडि रहँदै विश्वकपमा स्थान बनाउन सफल भएको हो । नेपालले ३.९३५ नेट रनरेट रहेको छ भने युएईको ३.७४० नेट रनरेट रहेको छ ।
छनोट भएसँगैं नेपालले अर्को वर्ष मलेसियामा हुने विश्वकप खेल्नेछ । छनोटको अन्तिम खेलमा युएईले दिएको ८४ रनको लक्ष्य पछ्याएको नेपालले १४.४ ओभरमा दुई विकेट गुमाउँदै ८६ रन बनाउँदैं ऐतिहासिक जित निकालेको हो । दुईपल्ट यु–१९ विश्वकप छनोट खेलेको नेपालले युएईलाई पहिलोपल्ट हराएको हो ।
नेपालको ऐतिहासिक जितमा ओपनर साना प्रभिनले अविजित रहँदै सर्वाधिक ३५ रन बनाइन् । ४२ बल खेलेकी उनले एक चौका प्रहार गरिन् । कप्तान पूजा महतो २१ रनमा आउट हुँदा सावित्री धामीले १२ रनको योगदान दिइन् । यस्तै, उपकप्तान सोनी पाख्रिन १३ रनमा अविजित रहिन् ।
त्यसअघि टस हारेर ब्याटिङको निम्तो पाएको घरेलु टोलीले युएईले निर्धारित २० ओभरमा ९ विकेट गुमाएर ८३ रनको योगफल तयार गरेको थियो । नेपालले विश्वकपमा छनोट हुन यो लक्ष्य १६.२ ओभरमा पूरा गरे पुग्ने समिकरण रहेको बनेको थियो ।
युएईका लागि कप्तान समाइरा धारनीधार्काले ४८ बलमा सर्वाधिक ३१ , रिनिथा रञ्जिथाले १८ बलमा २० तथा इन्दुजा नन्दकुमारी र लाभन्या केन्याले समान १० रन जोडिन् । एक समय ५९ रनमा २ विकेट गुमाएर बलियो स्थितीमा रहेको युएईले २४ रन जोड्दा ७ विकेट गुमायो ।
नेपालका लागि कृष्मा गुरुङले ४, रिया शर्मा र सिमाना केसीले समान २ तथा रचना चौधरीले १ विकेट लिए । कप्तान पुजा महतोले ४ ओभरमा मात्र ११ रन खर्चेर उत्कृष्ट बलिङ गरिन् ।
यु–१९ टि ट्वान्टी महिला विश्वकप आगामी वर्षको १८ जनवरी देखि २ फेब्रुवरी सम्म मलेसियामा आयोजना हुदैछ । विश्वकपमा छनोट भएसँगै नेपाल समूह डी मा अस्ट्रेलिया, बंगलादेश र स्कटल्याण्डसँगै रहेको छ । विश्वकपमा नेपालको पहिलो खेल १८ जनवरीमा बंगलादेशविरुद्ध रहेको छ ।
यसैबीच यु–१९ नेपाली महिला टोलीले विश्वकपका साथै यु–१९ एसिया कपमा स्थान बनाएको छ । युनाइटेड अरब इमिरेट्स(युएई) लाई ८ विकेटले पराजित गर्दै नेपाल विश्वकपका लागि छनोट भएसँगैं आगामी महिना एसिसीको आयोजनामा हुन लागेको पहिलो संस्करणको यु–१९ महिला एसिया कपका लागि समेत छनोट भएको हो ।
१४ देखि २१ डिसेम्बर सम्म मलेसियामा आयोजना हुने यु–१९ एसिया कपमा नेपाल सहित ६ राष्ट्रको सहभागीता रहनेछ । सहभागी ६ राष्ट्रलाई दुई समूहमा विभाजन गरिएको छ । समूह विभाजनमा नेपाल समूह बी मा रहेको छ । यस समूहमा नेपालका अलावा पाकिस्तान र भारत रहेका छन् । समूह ए मा भने श्रीलंका, बंगलादेश र आयोजक मलेसिया रहेका छन् ।
