भक्तपुर, कार्तिक २६
जिल्ला प्रहरी परिसर भक्तपुरले आइतवार पत्रकार भेटघाट एवम् अन्तरक्रिया कार्यक्रम आयोजना गरी चाडपर्व लक्षित सुरक्षा योजनाको प्रगती विवरण र भावी सुरक्षा योजना सार्वजनिक गरेको छ ।
परिसरमा आयोजित कार्यक्रममा प्रतिवेदन सार्वजनिक गर्दै परिसरका सूचना अधिकारी प्रहरी नायव उपरीक्षक ढुण्डीराज नेउपानेले यस वर्षको दशैं, तिहार र छठ पर्वमा लागू औषध अपराधका ५ घटनाबाट १० जना, बाल यौन दुरुपयोगका २, घटनाबाट २ जना, जुवाका ९ अपराधबाट ३२ जना, हुण्डीबाट १ जना, चोरीका ८ घटनाहरुबाट १५ जना, सवारी अंगभंगका ६ घटनाबाट ५ जना पक्राउ र १ जना फरार तथा ६ जना घाइते भएको जानकारी दिनुभयो ।
यस्तै दशै तिहार र छठ पर्व अवधिभर जिल्लामा अन्दाजी ४८ हजार रुपैंया बराबरको पटका बरामद गरेको, चार पटकसम्म गरेको बजार अनुगमनले रु. १५ हजार जरिवाना, १० हजार बराबरको सामान नष्ट गरेको, ट्राफिक नियम उलघंन गर्ने २१५७ सवारी साधन कारवाहीबाट १४ लाख पचपन्न हजार पाँच सय रुपैयाँ राजश्व संकलन गरेको र ८७ वटा सवारी दुर्घटनामा ३ जनाको मृत्यु, ५ जना गम्भिर घाइते र ५१ जना सामान्य घाइते भएको नेउपानेले बताउनुभयो ।
अपराधिक उपद्रव गर्न नहुने १ घटनामा २ जना, कर्तव्य ज्यानका २ घटनामा २ जना पक्राउ र २ जनाको मृत्य समेत भएको उल्लेख गर्दै सूचना अधिकारी नेउपानेले भवितव्य ज्यानका १८ घटनाबाट १८ जनाको ज्यान गएको बताउनुभयो ।
यस्तै फैसला कार्यान्वय सम्बन्धी कार्वाहीमा ४३ जना पक्राउ गरी ८१ हजार ७६० जरिवाना तथा १ वर्ष ६ महिना १६ दिने कैद सजाय असुल गरिएको जानकारी दिँदैं उहाँले चाडपर्व लक्षित सुरक्षा योजना कार्यान्वयनका लागि ६१७ जना प्रहरी कर्मचारीहरु परिचालन भएको बताउनुभयो ।
कार्यक्रममा परिसर प्रमुख प्रहरी उपरीक्षक माधब बुढाथोकीले आफू सूचना लुकाउने पक्षमा नरहेको स्पष्ट पार्दै पत्रकारलाई सूचना माग्न आग्रह समेत गर्नुभयो । “राज्यको चौथौं अंगको रुपमा रहेको पत्रकारलाई वेवास्ता गरेर जाने कुनै गुञ्जायस छैन,” उहाँले भन्नुभयो ।
उहाँले भावी रणनीतिक योजनाको रुपमा फैसला कर्यान्वयनमा जोड दिने, सवारी दुर्घटनालाई न्यूनिकरण गर्ने, लागू औषध नियन्त्रण गर्ने, आत्महत्या न्यूनिकरण गर्नको लागि प्रभावकारी रुपमा समुदाय प्रहरी साझेदारी कार्यक्रम सञ्चालन गर्ने र शान्ति सुरक्षा कायम गरी अपराध रोकथाम र नियन्त्रण गर्ने कार्यक्रमहरु पनि अघि सारेको जानकारी दिनुभयो ।
उहाँले चाडपर्व लक्षित सुरक्षा योजना अन्तर्गत यसवर्ष गतवर्षको तुलनामा चोरी, सवारी दुर्घटनालगायतका घटनामा कमी आएको बताउनुभयो ।
कार्यक्रममा जिल्ला ट्राफिक प्रहरी कार्यालय भक्तपुरका प्रमुख प्रविण खत्रीले जिल्लाका मुख्य सडकहरुको ट्राफिक लाईटहरुको व्यवस्थापनका लागि स्थानीय तहहरुसँग समन्वय भइरहेको बताउँदै सवारी कारवाही भन्दा सवारी दुर्घटना न्यूनिकरणका लागि ट्राफिक प्रहरी लागिपरेको दावी गर्नुभयो ।
नेपाल पत्रकार महासंघका अध्यक्ष जगतकृष्ण प्रजापतिले कुनै पनि घटनाको विवरण छिटो छरिटो माध्यमबाट सार्वजनिक गर्न, सडक दुर्घटना एवम् ट्राफिक प्रहरीले गरेका कारवाहीको विवरण जिल्लामा एकत्रित गरी राख्न, साना होटल तथा खाजाघरमा हुने यौनजन्य क्रियाकिलाप र मेडिकलहरुबाट हुने लागु औषध कारावार नियन्त्रण गर्न सुझाव दिनुभएको थियो ।
