भक्तपुर, कार्तिक २५
भक्तपुरको मध्यपुर थिमि नगरपालिका–९ राधेराधेस्थित सुजु मेडिकलका सञ्चालक कैलालीको धनगढी उपनगरपालिका–२ घर भएका ४८ वर्षिय गणेश प्रसाद आचार्यलाई प्रहरीले लागू औषध बिक्रि वितरण गरेको अभियोगमा शनिवार पक्राउ गरेको छ ।
राधेराधेमा लागू औषधको बिक्रि वितरण भइरहेको भन्ने सूचनाका आधारमा प्रहरीले अनुसन्धानको क्रममा उनलाई पक्राउ गरेको हो । अनुसन्धानको क्रममा प्रहरीले सुनसरीको धरान उपमहानगरपालिका–१७ घर भएका २८ वर्षिय राजेश गुरागाईंलाई पक्राउ गरेको थियो ।
प्रहरीले गुरागाईंको साथबाट ५० एमजीको ट्याव्नाडोल ३ थान फेला परेको र उनलाई सोधपुछको क्रममा रोधरोधस्थित सुजु मेडिकलबाट खरिद गरेको बताएपछि प्रहरीले उक्त मेडिकलमा छापा मारी लागू औषधसहित आचार्यलाई पक्राउ गरिएको जिल्ला प्रहरी परिसर भक्तपुरका सूचना अधिकारी प्रहरी नायव उपरीक्षक ढुण्डीराज नेउपानेले जानकारी दिनुभयो ।
प्रहरीले आचार्यको सुजु मेडिकलबाट टपेनाडोल ५० एमजीको ३२० थान ट्याव्लेट र टपेनाडोल १०० एमजीको २१० थान ट्याब्लेट बरामद गरेको छ ।
गुरागाईंलाई हाजिरी जमानीमा परिवारको जिम्मा लगाईएको प्रहरीले जनाएको छ । आचार्यलाई भक्तपुर जिल्ला अदालतबाट ५ दिनको म्याद थप भई अनुसन्धान भइरहेको प्रनाउ नेउपानेले बताउनुभयो ।
यसैगरी भक्तपुर सल्लाघारीस्थित रानीपोखरी क्षेत्रबाट शुक्रवार अवैध लागू औषधसहित दुई जनालाई प्रहरीले पक्राउ गरेको छ । पक्राउ पर्नेहरुमा दोलखाको शैलुङ गाँउपालिका–६ घर भई भक्तपुर सल्लाघारी बस्ने १८ वर्षिय सुशिल कार्की र रामेछापको मन्थली नगरपालिका–२ घर भई हाल भक्तपुर नगरपालिका–१ बस्ने २२ वर्षिय हिरे माझी रहेका छन ।
प्रहरीले उनीहरुको साथबाट अवैध लागू औषध ५० एमजीको ७० थान ट्रामा बरामद गरिएको जिल्ला प्रहरी परिसर भक्तपुरका सूचना अधिकारी प्रहरी नायव उपरीक्षक ढुण्डीराज नेउपानेले जानकारी दिनुभयो । उनीहरुलाई भक्तपुर जिल्ला अदालतबाट ५ दिन म्याद थप गरी थप अनुसन्धान कार्य भईरहेको प्रनाउ नेउपानेले बताउनुभयो ।
