भक्तपुर, कार्तिक २४
नेपाली कांग्रेसका केन्द्रीय सदस्य बलबहादुर केसीले लौह पुरुष एवम् सर्वमान्य नेता स्व. गणेशमान सिंह त्याग र निष्ठाको प्रतिमूर्ति भएको बताउनुभएको छ । स्व. सिंहको ११० औं जन्मजयन्तीको अवसरमा शनिवार नेपाली कांग्रेस भक्तपुरले गणेशमान सिंह स्मृति वाटिका एवम् प्रतिमा संरक्षण समितिको संयोजनमा गणेशमान वाटिका कटुञ्जेमा आयोजित माल्यापर्ण कार्यक्रममा नेता केसीले सो बताउनुभएको हो ।
उहाँले सिंहले देखाएको बाटोमा अग्रसर हुन सके कांग्रेस र समग्र मुलुकले लक्ष्य हासिल गर्न सक्ने बताउनुभयो । उहाँले अहिलेको राजनीतिलाई गणेशमान जस्तो नेताको खाँचो रहेको बताउँदैं सिंहको योगदानलाई पार्टीले मात्रै नभई सिङ्गो देशले भुल्न नहुनेमा जोड दिनुभयो ।
कार्यक्रममा नेपाली कांग्रेस भक्तपुरका सभापति एवम् प्रतिनिधि सभा सदस्य दुर्लभ थापाले सिंहको लामो, कठिन र सङ्घर्षशील राजनीतिक जीवनका विविध पक्षबारे चर्चा गर्दै प्रजातन्त्र प्राप्तिमा सिंहको योगदानको चर्चा गर्नुभयो ।
यस्तै गणेशमान सिंह स्मृति वाटिका एवम् प्रतिमा संरक्षण समितिका अध्यक्ष माथवरसिंह बस्नेत र पाटी जिल्ला सहसचिव यादव अधिकारीले स्व. सिंहको विविध पक्षका बारेमा चर्चा गर्नुभएको थियो ।
प्रजातन्त्र पुनःस्थापनाका लागि २०४६ सालमा भएको जनआन्दोलनका सर्वोच्च कमान्डर स्व. सिंह १९७२ साल कात्तिक २४ गते काठमाडौंको क्षेत्रपाटीमा जन्मेका थिए भने सिंहको २०५४ असोज २ गते निधन भएको थियो । सिंहले १९९७ सालमा स्थापना भएको नेपालको पहिलो राजनीतिक दल प्रजा परिषद्को सदस्य भई राणा शासन हटाउने अभियानमा सक्रिय भएका थिए ।
राणाशासन विरोधी अभियानमा लागेपछि तत्कालीन सरकारले उनलाई लामो समय जेल राखेको थियो । जेलबाट भागेर भारतमा पुगी अर्का नेता बिपी कोइरालासँग राजनीतिक सम्बन्ध विकसित गरेर २०१५ सालमा पहिलो निर्वाचनपछि बनेको सरकारमा वरिष्ठ मन्त्री भएका थिए ।
वि. सं. २०४६ सालको जनआन्दोलन सफल भएपछि तत्कालीन राजा वीरेन्द्र शाहले प्रधानमन्त्री बन्न गरेको आग्रहलाई त्याग गर्दै सिंहले आफ्ना समकक्षी नेता कृष्णप्रसाद भट्टराईलाई अघि सारेको घटना नेपाली राजनीतिमा नमूनाको रुपमा लिइँदै आएको छ ।
