सुनीता तुलाधर, कार्तिक २१ गते, ललितपुर ।
माझखण्ड बुद्ध विहारमा हिजो कथिन चीवर दान सम्पन्न भएको छ । भिक्षु धर्मरत्न र भिक्षु संघरत्नले पहिलो वर्षावास पूरा गर्नुभएको उपलक्ष्यमा कथिन दाता थाइल्याण्डका अनोङनार्ट चुएर्चन–एड, सुंगवान प्लिकामिन र नेपालका सानुलाल अवाले तथा सृजना बज्राचार्य एवं परिवारले भिक्षु महासंघलाई चीवर दान गरेका छन् ।
ललितपुरको बागमती गाउँपालिका अन्तर्गत माझखण्डको स्थानीय क्षेत्रमा बिहानै भिक्षुगण, अनागारिका गुरुमाहरु लगायत श्रद्धालु उपासकउपासिकाहरुले कथिन चीवर शोभायात्रा गरी विहारमा पुगेपछि कार्यक्रमको औपचारिक शुरुवात भएको थियो ।
मन, वचन र कर्म शुद्ध गर्न उपासकउपासिकाहरुले पञ्चशील प्रार्थना गरेका थिए । अखिल नेपाल भिक्षु महासंघका महासचिव भिक्षु धर्मगुप्त महास्थविरले पञ्चशील प्रदान गनुभएको थियो भने भिक्षु राहुल महास्थविरले बुद्धपुजा गराउनु भएको थियो ।
कथिन चीवर दानको महत्व र आनिशंसबारे धर्मदेशना दिनुहुँदै भिक्षु कोण्डन्य महास्थविरले “जस्तो फल रोपिन्छ, त्यस्तै फल प्राप्त हुन्छ” भन्नुभयो ।
यादिसं वपते बीजं, तादिसं हरते फलं ।
कल्याणकारी कल्याणं, पापकारी च पापकं ।।
माझखण्ड जस्तो विकट पहाडी क्षेत्रमा प्रथम पटक आउँदा जिब्रो टोक्दै आएको र भोलि कसरी फर्कने भन्ने तर्कनाले राती राम्ररी सुत्न समेत नसकेको तर भोलि बिहान त्यहाँको रमणीय मनमोहक दृश्यले यो सबै डर बिर्साएको स्मरण गर्नुहुँदै उहाँले भिक्षु बोधिज्ञान महास्थविरको उक्त प्रथम वर्षावासमा माझखण्ड बुद्ध विहारका साथै माझखण्डलाई समेत विकास गर्न बोधिज्ञान भन्तेले एकपटक मात्रै नभई तिनपटक अर्थात ह्याट्रिक वर्षावास बस्नुपर्ने बताएको र बोधिज्ञान भन्तेले तीनपटक नै वर्षावास बस्नु भई विहारका साथै माझखण्डलाई नै राम्रो परिवर्तन गर्नुभएकोमा खुशी व्यक्त गर्नुभयो ।
यसपटक चौथोचोटी पनि आफूले नै उपदेश दिन पाएकोमा बोधिज्ञान भन्तेप्रति अनुग्रहीत भएको बताउनुहुँदै उहाँले वर्षावासको समयमा एकठाउँमा बस्ने, धर्मको अभ्यास गर्ने, धार्मिक चर्यालाई निरन्तरता दिने, श्रद्धालु उपासकउपासिकाहरुको भावनालाई कदर गर्ने, धार्मिक जीवनयापनमा सहजीकरण गर्ने जुन भगवान बुद्धले विनय बनाउनुभएको छ, त्यसलाई हालसम्म पनि विश्वभरका भिक्षुहरुले निरन्तरता दिइरहेको भन्नुभयो ।
सो कार्यक्रममा बागमती गाउँपालिकाका अध्यक्ष बीरबहादुर लोप्चनले माझखण्डमा बाटोको स्तरोन्नती कार्य गरीरहेको र अबको बाँकी २ वर्षको कार्यकालमा पनि माझखण्ड र माझखण्ड बुद्ध विहारलाई सहयोग गर्न तत्पर रहेको तथा यसका लागि विहारका निम्ति आवश्यक सहयोगको योजना बनाई गाउँपालिकामा बुझाउन हुन अनुरोध गर्नुभयो ।
कार्यक्रममा थाई कथिनदाताहरुले आफ्नो चलन अनुसार दाताहरुद्वारा नै कथिन वाक्य वाचन गरी भिक्षु महासंघलाई कथिन चीवर दान गरेका थिए ।
भिक्षु धर्मगुप्त महास्थविरले अष्ट परिष्कारको वाक्य वाचन गराउनुभएपछि ६३ जना दाताहरुले भिक्षु महासंघलाई अष्ट परिष्कार दान गरेका थिए । अन्तमा सो विहारका विहारप्रमुख भिक्षु बोधिज्ञान महास्थविरले पुण्यानुमोदन गराउनु भएपछि उपस्थित श्रद्धालु उपासकउपासिकाहरुले भिक्षुगण र अनागारिका गुरुमाहरुलाई दान प्रदान गरेका थिए ।
कार्यक्रममा उक्त विहारमा यस वर्ष वर्षावास बस्नुभएका भिक्षु धर्मरत्नले वर्षावासको अनुभव सुनाउनुहुँदै सहयोग गर्नुहुने सम्पूर्णलाई साधुवाद दिनुभएको थियो भने स्वागत मन्तव्य विहारका अध्यक्ष चन्द्रबहादुर स्याङताङ्गले दिनुभएको थियो । अनागारिका पवरञाणीले कार्यक्रम संचालन गर्नुभएको थियो ।
असार पूर्णिमादेखि कोजाग्रत पूर्णिमासम्म तीन महिना थेरवाद भिक्षुहरु वर्षावास बस्ने र त्यसको सकिमिला पूर्णिमासम्म एकभित्र एकचोटि वर्षावास बसेको विहारमा कथिन चीवर दान गर्ने विनय–नियम रहेको छ ।
