भक्तपुर, कार्तिक १५
जिल्ला प्रशासन कार्यालय भक्तपुरले मर्यादित रुपमा देउसी भैलो खेल्न आग्रह गरेको छ । प्रशासनले बुधवार प्रेस विज्ञप्ती जारी गर्दै तिहारको अवसरमा खेलिने देउसी तथा भैलो लगायतका साँस्कृतिक कार्यक्रमहरु मर्यादित, अनुशासित एवम् व्यवस्थित रुपमा सञ्चालन गर्न आग्रह गरेको हो ।
सहायक प्रमुख जिल्ला अधिकारी डोरेन्द्र निरौलाको हस्ताक्षरमा प्रकाशित विज्ञप्तीमा जिल्लामा शान्ति, सुव्यवस्था र सुरक्षाको भरपर्दो व्यवस्था मिलाईएकाले मौलिक परम्परा, संस्कृति र प्रचलित कानूनको पालना गरी भयरहित वातावरणमा निर्धक्क भई पारस्परिक सदभाव, एकता र मित्रता सुदृढ गर्दै हर्षोल्लासपूर्ण रुपमा चाडपर्व मनाउन समेत आग्रह गरेको छ ।
विज्ञप्तीमा चाडपर्वको नाममा जथाभावी होहल्ला एवम् झैं झगडा गर्ने, मादक पदार्थ सेवन गरी पारिवारिक एवम् सामाजिक जनजीवन तथा सार्वजनिक मर्यादा र शान्ति खलल गर्ने, कानून विपरित जुवातास, लङ्गुरबुर्जा खेल्ने÷खेलाउने, भुईचम्पा, पटाका, आतसबाजी जस्ता जोखिम निम्त्याउने र वातावरण प्रदुषण हुने विस्फोटक एवम् प्रज्जवलनशिल प्रदार्थको ओसारपसार, बिक्रि वितरण गर्ने र शान्ति सुरक्षामा नकारात्मक पुग्ने कार्यहरु नगर्न÷नगराउन हुन आग्रह गरिएको छ ।
प्रशासनले मादक पदार्थ सेवन गरी सार्वजनिक स्थानमा होहल्ला र झैं झगडा गरी शान्ति सुरक्षालाई नकारात्मक असर गर्ने गतिविधिहरु, बजारमा माल वस्तुहरुको कृतिम अभाव सृजना गर्ने, कालो बजारी गर्ने तथा उपभोक्ता हकहित विपरित कार्य गर्ने कार्यहरु, जुवातास, लङ्गुरबुर्जा जस्ता रुपैंया हारजित हुने कानून विपरितका खेल खेल्ने वा खेलाउने कार्यहरु भए नजिकको प्रहरी कार्यालय जानकारी गराउन समेत आग्रह गरेको छ ।
