भक्तपुर, कार्तिक १४
मध्यपुर महोत्सव २०८१ लाई ऐतिहासिक रुपमा सफल बनाउन क्षेत्रगत समिति गठनले पूर्णता पाएको छ । मध्यपुर महोत्सव २०८१ मूल समारोह समितिले नगरका परम्परागत बस्ती क्षेत्रको आधारमा ६ वटा साँस्कृतिक क्षेत्रगत समिति गठन गर्ने निर्णय गरे बमोजिम मंगलवार वडा नं. ९ को टिगनीमा क्षेत्रगत समिति गठन भएसँगैं क्षेत्रगत समितिले पूर्णता पाएको हो ।
जसअनुसार वडा नं. १ का वडाअध्यक्ष बाबुकाजी डंगोलको अध्यक्षतामा दिव्यश्वरी क्षेत्रगत समिति गठन गरेको छ । मध्यपुर थिमि नगरपालिका वडा नं. १, २ र ३ (तत्कालिन दिब्यश्वरी गाविस अन्तर्गतका क्षेत्र) का स्थानियहरुको भेलाले दिव्यश्वरी क्षेत्रगत समिति गठन गरेको हो ।
भेलाले वडाअध्यक्ष डंगोलको संयोजकत्वमा वडा नं. १, २ र ३ बाट ८÷८ जना रहने गरी समिति गठन गरेको वडा नं. २ का वडाअध्यक्ष श्रीकृष्ण श्रेष्ठले जानकारी दिनुभयो ।
यस्तै वडा नं. ४ का वडाअध्यक्ष बालकृष्ण पात्या श्रेष्ठको संयोजकत्वमा बालकुमारी क्षेत्रगत समिति, वडा नं. ६ का वडाअध्यक्ष ज्ञानदास प्रजापतिको संयोजकत्वमा वडा नं. ५ र ६ को चपाचो क्षेत्रगत समिति, वडा नं. ७ का वडाअध्यक्ष कृष्णकुमार प्रजापतिको संयोजकतव्मा नगदेश क्षेत्रगत समिति, वडा नं. ८ का वडाअध्यक्ष रमेश थापा श्रेष्ठको संयोजकत्वमा बोदे क्षेत्रगत समिति र र वडा नं. ९ का वडाअध्यक्ष सानुकाजी राजबहाकको संयोजकत्वमा टिगनी र निकोशेरा क्षेत्रगत समिति गठन गरिएको मध्यपुर थिमि नगरपालिकाका प्रमुख सुरेन्द्र श्रेष्ठले बताउनुभयो ।
पर्यटनलाई स्थानीय विकासको साझेदार बनाउनु पर्दछ र स्थानीय सम्पदालाई रोजगारी र आयसँग जोडेर स्थानीय अर्थतन्त्रहरूलाई थप गतिशिल एवम् प्रगतिशिल बनाउन सकिन्छ भन्ने अवधारणामा यही पुस १२, १३ र १४ गते तीन दिने मध्यपुर महोत्सव २०८१ को आयोजना गर्ने तयारी भइरहेको नगर प्रमुख श्रेष्ठले बताउनुभयो ।
पर्यटनबाट हुने प्रत्यक्ष, अप्रत्यक्ष र उत्प्रेरित आर्थिक प्रभावलाई आत्मसाथ गरी स्थानीय अर्थतन्त्रका विभिन्न पक्षहरूमा गुणात्मक रूपान्तरणको आधार महोत्सवले तयार गर्ने विश्वास व्यक्त गर्दै नगरप्रमुख श्रेष्ठले भन्नुभयो, “पर्यटन प्रवर्द्धनका विविध पाटाहरू मध्ये विभिन्न अवसर र आकारमा आयोजना गरिने महोत्सव पर्यटन विकासको दिगो आधार र प्रवर्द्धनको प्रभावशाली औजार हो ।”
कला, संस्कृति, पेशा, प्रकृति र स्मारकहरूले भरिपूर्ण भइकन पनि पर्याप्त प्रवर्द्धनको अभावमा मध्यपुरलाई पर्यटकीय गन्तव्यको रूपमा स्थापित गर्न नसकिरहेको तितो अनुभवलाई आत्मसाथ गर्दै महोत्सव मार्फत मध्यपुर थिमिमा आन्तरिक र बाह्य पर्यटकलाई आकृषित गराईने योजना रहेको उहाँले बताउनुभयो ।
उहाँले नगरपालिकाले विगतमा आयोजना गरेको धिमे बाजा प्रतियोगिता, वः फेस्टिभलको सफलताले पनि महोत्सव आयोजना गर्ने प्रेरित गरेको बताउनुभयो ।
महोत्सवमा स्थानीय विशेषतायुक्त सम्पदाहरूलाई केन्द्रमा राखेर निम्न रणनीतिक आयामहरू मार्फत् एक जीवन्त र दिगो पर्यटन मोडेलको सिर्जना गर्न सक्ने विश्वास लिएको उहाँले बताउनुभयो ।
महोत्सवको मूल उद्देश्य मध्यपुरलाई नयाँ पर्यटकीय गन्तव्यको रुपमा विकास गरी दीर्घकालिन रूपमा नगर र नगरबासीको आर्थिक समृद्धिमा टेवा पुर्याउनु रहेको नगर प्रमुख श्रेष्ठले बताउनुभयो । “नगरको स्थानीय कला, संस्कृति र सम्पदाको प्रदर्शन गर्ने, स्थानीय मौलिक पेशा, परिकार र उत्पादनको प्रवर्द्धन गर्ने, मध्यपुरलाई पर्यटकीय गन्तव्यको रूपमा परिचित गराउने प्रमुख उद्देश्य महोत्सवको रहेको छ,” उहाँले भन्नुभयो ।
भौगोलिक रुपमा महोत्सव मध्यपुर थिमि नगरपालिकाभित्रका एतिहासिक बस्तीहरू मूलतः थिमि, नगदेश, बोदे र तिगनिक्षेत्रमा आयोजना गरिनेछ भने समग्र नगरक्षेत्रलाई ६ वटा विभिन्न साँस्कृतिक क्षेत्रको रूपमा प्रस्तुत गरी नगरको सम्पूर्ण सँस्कृति प्रदर्शन गरिनेछ ।
विषयगत रूपमा महोत्सवमा नगरभित्रका कला, संस्कृति, परम्परागत पेशा, प्रकृति र पुरातात्विक स्मारकहरूको प्रदर्शनी गरिने नगर प्रमुख श्रेष्ठले बताउनुभयो ।
महोत्सवलाई व्यवस्थितरुपमा सञ्चालन गरी सफल बनाउन क्षेत्रगत समिति अन्तर्गत आर्थिक व्यवस्थापन समिति, संस्कृति तथा सम्पदा व्यवस्थापन समिति, स्थानीय परिकार र उत्पादन प्रवर्ध्दन समिति, महोत्सव प्रदर्शनी व्यवस्थापन समिति, साँस्कृतिक कार्यक्रम व्यवस्थापन समिति, प्रचारप्रसार तथा प्रकाशन समिति, सुरक्षा व्यवस्थापन समिति, सरसफाइ व्यवस्थापन समिति, स्वयम् सेवक तथा पार्किंङ व्यवस्थापन समिति र स्वास्थ्य व्यवस्थापन समिति गरी कुल १० वटा समिति गठन गरिने छ । यस्तै सल्लाहकार समिति र महोत्सव सञ्चालन समिति पनि गठन गरिने नगरप्रमुख श्रेष्ठले जानकारी दिनुभयो ।
महोत्सवमा गेडागुडी, कृषि औजार, चिकंसाः, अयलाः, पोटरी, माटोको भाँडा बनाउने परम्परागत पेशा, थिमिको मौलिक उत्पादन दही, साँस्कृतिक एवम् पम्परागत बाजा, नेवाः भ्वय्, ख्वापाः, चित्र, छत्र, मैलिक परिकार, टिगनीको बजी, दाफा भजन, थिमिको परिचयसहितको डकुमेन्ट्री, जात्राको खट, यांमता, नउबाजां, गुंलाबाजं, महाकाली, भैलः, पुलुकिसी, बिस्काजात्रा डकुमेन्ट्री, साँस्कृतिक नाचलगायतको प्रर्दशनी रहने छ
मध्यपुर थिमि नगरपालिका मूर्त, अमूर्त सम्पदाको धनी र छुट्टै पहिचान तथा मौलिकता बोकेको नगर भएता पनि पर्याप्त प्रवर्द्धनको अभावमा पर्यटकीय गन्तव्यको रुपमा विकास हुन नसकिरहेको अबस्थामा रोजगारी सिर्जना र आम्दानीको साधन बनाएर पर्यटन मार्फत नगरको अर्थतन्त्रलाई थप गतिशिल एवम् प्रगतिशित बनाई स्थानीय कला, संस्कृति र सम्पदाको प्रवर्द्धन गर्न महोत्सव आयोजना हुने भएको हो ।
