भक्तपुर, कार्तिक १२
वरिष्ठ गायक मधु क्षेत्री भक्तपुरमा सम्मानित भएका छन् । फूलै फूल मात्र पनि होइन रैछ जीवन, पानी खाने निउले तिम्रो घर आउला, हुरीले उडाउन सकेन, साईली र माहिली पोइला गएछन् बाउ बाजेको नाकै काटेर लगायतका थुप्रै कालजयी गीतका गायक क्षेत्रीलाई भक्तपुर सांगीतिक समाजले आइतवार सम्मान गरेको हो ।
समाजले शुभ दीवापली, नेपाल संवत ११४५ न्हुंद र छठ पर्व २०८१ को अवसरमा आयोजित शुभकामना आदान प्रदान कार्यक्रमको अवसरमा बरिष्ठ गायक क्षेत्रीलाई सम्मान गरिएको समाजका अध्यक्ष अल्बर्ट बज्राचार्यले बताउनुभयो । सांगीतिक क्षेत्रमा विगत ४ दशक भन्दा बढि समयदेखि अतुलनिय योगदान पुर्याउदै आएका क्षेत्रीलाई सम्मान गर्न पाउनु खुशी र गौरबको कुरा भएको उहाँले बताउनुभयो ।
कार्यक्रममा गायक क्षेत्रीले शुभकामना मन्तव्य राख्दै आफुले पहिला रेडियो नेपालमा गरेको संघर्षदेखि आफ्ना समकालीन मित्र गायक उदितनारायण झा सँगसँगै बिताएका दिनहरु सम्झिदै आफ्नो लोकप्रिय गीत पनि गाउनुभएको थियो ।
वरिष्ठ गीतकार तथा समाजका सल्लाहकार सुवासचन्द्र ढुंगेलले समाजले नेपाली संगीतलाई थप उचाईमा पुर्याउँदैं विभिन्न सांगीतिक कार्यक्रमको स्मरण गरे निरन्तर सक्रियताको शुभकामना ब्यक्त गर्नुभयो ।
समाजका निवर्तमान अध्यक्ष प्रवीण शाहीले गीतकार लक्ष्मीप्रसाद कसुलाको शब्दमा र आफ्नै आवाज अनि संगीतमा भर्खरै रेकर्ड गरेको नयाँ गीत ‘आउँ नाचौ’ बोलको गीतको लिरिकल भिडियो सार्वजनिक गरिएको थियो । कार्यक्रममा गीत संगीत र साहित्यकर्मीहरुको उल्लेख्य उपस्थिति रहेको थियो ।
