भक्तपुर, कार्तिक ११
दोश्रो भेट्रान्स फुटबल प्रतियोगिताको उपाधि ठमेल टुरिजम डेभलपमेन्ट काउन्सिलले जितेको छ । फुटबलर्स मिसन टुगेदरद्वारा सानो थिमिस्थित मध्यपुर युथ एसोसियसनको खेल मैदानमा सञ्चालित प्रतियोगिताको आइतवार सम्पन्न फाइनलमा ठमेलले फ्रिडम फाइटर युवा क्लबलाई २–१ गोलले पराजित गरी उपाधि जितेको हो ।
ठमेलका लागि बुद्धराज लिम्बु र कोमल खवासले गोल गरे भने फ्रिडमका लागि मिलन राईले गोल गरे । ठमेलले विजेता ट्रफीका साथै नगद रु. ८ लाख नगद पुरस्कार जिते भने उपविजेता फ्रिडमले नगद रु पाँच लाखमा चित्त बुझाए ।
प्रतियोगितामा ठमेलका मीनबहादुर बस्नेत उत्कृष्ट गोलकिपर, भेषराज लिम्बु उत्कृष्ट मिल्डफिडर, विनोद आले उत्कृष्ट प्रशिक्षक, टासी छिरिङ्ग सर्वोत्कृष्ट खेलाडी घोषित भए ।
यस्तै फ्रिडमका राजकुमार घिसिङ्ग उत्कृष्ट डिफेन्डर, विकर्ण श्रेष्ठ उत्कृष्ट फरवार्ड चुनिए । हाम्रो धरान फुटबल क्लबले अनुशासित टिम र सबैभन्दा बढी उमेरका फुटबल खेलाडी वीरगञ्जका ऋतु शाक्यलाई पनि पुरस्कृत गरिएको थियो ।
नागार्जुन नगरपालिकाको प्रायोजनमा कात्तिक ३ गतेदेखि मध्यपुर युथ एसोसियसनको खेल मैदानमा सञ्चालित प्रतियोगितामा कुल २१ टिमको सहभागिता रहेको थियो ।
विजेता, उपविजेता, सर्वोत्कृष्ट खेलाडीहरुलाई उपप्रधानमन्त्री तथा शहरी विकास मन्त्री प्रकाशमान सिंह, नागार्जुन नगरपालिकाका प्रमुख मोहन बहादुर बस्नेत, मध्यपुर थिमि नगरपालिकाका नगरप्रमुख सुरेन्द्र श्रेष्ठ, गोदावरी नगरपालिकाको प्रमुख गजेन्द्र महर्जन र फुटबलर्स मिसन टुगेदरका अध्यक्ष अशोकरत्न बज्राचार्य, एन्फाका पूर्वअध्यक्ष कर्मा छिरिङ्ग शेर्पा, मध्यपुर थिमि नगरपालिकाका वडाध्यक्षहरु बाबुकाजी डंगोल, श्रीकृष्ण श्रेष्ठ र कृष्णहरी आचार्यलगायतले पुरस्कार वितरण गरेका थिए ।
