भक्तपुर, भदौ २२
नेपाली कांग्रेसका युवा नेता रवि राणाले सूर्यविनायक नगरपालिका–७, गुण्डुस्थित तिथली नगरकोटी धिमे खलःलाई आर्थिक सहयोग प्रदान गरेको छ । राणाले शनिवार धिमे खलःका संयोजक विनय नगरकोटीलाई सहयोग रकम हस्तान्तरण गर्नुभएको हो ।
सो अवसरमा राणाले कला संस्कृति देशको पहिचान भएकाले यसलाई बचाएर राख्नु सबैको दायित्व भएको बताउनुभयो । उहाँले नेवार समूदायको मौलिक एवम् परम्परागत धिमे बाजा नयाँ पिढीँलाई प्रशिक्षित गरेर खलःले उल्लेख्य कार्य गरेको बताउँदैं स्थानीय कला संस्कृतिको संरक्षण गर्ने युवाहरुको कार्यमा आफ्नो सधैं साथ सहयोग रहने प्रतिवद्धता जनाउनुभयो ।
संस्कृति र परम्परा जोगाउन लागिपरेका युवा पुस्तालाई सबैले प्रोत्साहित गर्नुपर्ने प्रष्ट पार्दै उहाँले यसलाई भेदभाव र पुर्वाग्रह नराख्न स्थानीय सरकारको ध्यानाकर्षण समेत गराउनुभयो ।
समाजको लागि सहयोग गर्न धेरै धन होइन, ठुलो मन चाहिने भन्दै वरिष्ठ पत्रकार रमेश खड्काले रवि राणा जस्ता युवाहरु विकासका सम्बाहक भएको बताउनुभयो ।
खलःले हाल १२ जना स्थानीय युवा युवतीहरुलाई धिमे बाजा प्रशिक्षण गराइरहेको खलःका संयोजक नगरकोटीले जानकारी दिनुभयो । ती प्रशिक्षार्थीहरुको बाजा पिथनेगु (दिक्षान्त) कार्यक्रम आगामी शनिवार हुने जानकारी दिँदैं उहाँले उक्त कार्यक्रममा नासः द्यो (नाट्श्वरी)को पुजाका साथै भोज समेत गर्नुपर्ने भएकाले सहयोगका लागि आह्वान गर्नुभयो ।
धिमे बाजा समूहलाई दीक्षित गर्ने प्रयोजनका लागि खर्च चाहिने र त्यो खर्च माग्दा स्थानीय वडा र पालिकाले सुनुवाइ नगरेको उहाँले गुनासो गर्नुभयो । “वडा र नगरपालिकामा सहयोग माग्दा सहगोग नदिएको र दिक्षितलाई दिक्षान्त समारोह गर्न समेत नसक्ने अवस्थामा युवा नेता राणाको सहयोगले हामीलाई हौसला प्रदान गरेको छ,” उहाँले भन्नुभयो ।
