भक्तपुर, चैत्र २६
मध्यपुर थिमि नगरपालिकाको आयोजनामा सोमवार बोडेमा सम्पन्न उपत्यका व्यापी धिमे बाजा प्रतियोगितामा सूर्यविनायक नगरपालिका वडा नं. १ सिरुटारको लुँनिभा धिमे खलः प्रथम भएको छ ।
लाकुछें धिमे गुठी र खपला धिमे गुठीको सहकार्यमा आयोजित प्रतियोगितामा लुँनिभाले प्रथम हुँदैं आकर्षण शिल्ड, प्रमाणपत्र र नगद २५ हजार पुरस्कार जित्न सफल भएको छ । लुँनिभा गत शनिवार भक्तपुरमा सम्पन्न प्रथम बागमती प्रदेश स्तरीय धिमे बाजा प्रतियोगितामा पनि प्रथम भएको थियो ।
प्रतियोगितामा चाँगुनारायण नगरपालिका वडा नं. ९, ताथलीको ताथली धिमे खलः दोस्रो हुन सफल भएको छ । ताथलीले शिल्ड, प्रमाणपत्र र नगद २० हजार पुरस्कार प्राप्त गरे । ताथली पनि गत शनिवार भक्तपुरमा सम्पन्न प्रथम बागमती प्रदेश स्तरीय धिमे बाजा प्रतियोगितामा पनि द्धितिय भएको थियो ।
त्यसैगरी सूर्यविनायक नगरपालिका १, सिरुटारको श्री नासः धिमे खलः तेस्रो र मध्यपुर थिमिको श्री ईन्द्रायणी धिमे खलः चौंथो हुन सफल भएको छ । नासः धिमे खलःले नगद १५ हजार र ईन्द्रायणीले नगद १० हजार पुरस्कार प्राप्त गरे ।प्रतियोगितामा निर्णायक मण्डलले श्री नास भैल धिमे खलः थानकोट काठमाण्डौंलाई जर्ज च्वाइस अवार्ड प्रदान गर्दै प्रोत्साहित गरेको थियो ।
प्रतियोगितामा काठमाण्डौं उपत्यकाका विभिन्न नगरपालिकाका ५० वटा धिमे खलः, समूह, पुचः, गुठीहरुको सहभागिता रहेको प्रतियोगिता संयोजक दिलकृष्ण प्रजापतिले जानकारी दिनुभयो ।
प्रतियोगितामा विजयी धिमे खलःलाई पुरस्कृत गर्दै मध्यपुर थिमि नगरपालिकाका प्रमुख सुरेन्द्र श्रेष्ठले बोडे आफैंमा पनि साँस्कृतिक शहर भएको बताउनुभयो । उहाँले बोडेको जिब्रो छेड्ने जात्राको प्रचारका लागि पनि यस वर्ष प्रतियोगिता बोडेमा आयोजना गरिएको जानकारी दिनुभयो ।
प्रतियोगितामा सहभागी मध्ये युवा वर्गको बाहुल्यताले धिमे बाजालाई पुस्तान्तरण गर्न धिमे बाजा प्रतियोगिताले थप योगदान दिएको अनुभुती भएको उहाँले बताउनुभयो ।
उहाँले सामूदायिक विद्यालयको शैक्षिक गुणस्तर बृद्धिका लागि नगरपालिकाले दिवा खाजा, शिशु स्याहार केन्द्र, विद्यालयका अतिरिक्त क्रियाकलापको लागि खेल शिक्षकको व्यवस्था, सामूदायिक विद्यालयको शौचालयको सरसफाईलगायतमा नगरपालिकाले लगानी गरिरहेको जानकारी दिनुभयो ।
मध्यपुर थिमि नगरपालिकाका उपप्रमुख विजयकृष्ण श्रेष्ठले पर्यटनबाट मात्र मध्यपुरलाई समृद्ध नगर बनाउन सकिने बताउनुभयो । उहाँले बोडेको जिब्रो छेड्ने जात्रा विश्व प्रसिद्ध रहेको चर्चा गर्दै बोडेको ऐतिहासिक सम्पदा, पार्क र पोखरीलाई पयर्टन र आय आर्जनसँग जोड्दै लैजाने लक्ष्य रहेको बताउनुभयो ।
उहाँले स्थानीय उत्पादनलाई पर्यटनसँग जोड्दै लैजानु पर्नेमा जोड दिँदैं यहाँको मौलिक नामहरुको संरक्षण गरी मौलिक पहिचानसमेत संरक्षण हुने विश्वास व्यक्त गर्नुभयो ।
प्रतियोगिताका संयोजक दिलकृष्ण प्रजापतिले प्रतियोगिताले बोडेको सम्पदा, कला सँस्कृतिको प्रचार प्रसारमा उल्लेख्य योगदान गरेको विश्वास व्यक्त गर्नुभयो ।
प्रतियोगितासँगै यसवर्ष मध्यपुर थिमिको स्थानीय मौलिक उत्पादन र मौलिक खानाको परिकारको प्रर्वद्धनका लागि सँस्कृति मेला २०८० र फोटो प्रदर्शनी पनि आयोजना गरिएको थियो ।
स्थानीय उत्पादन र परिकार प्रदर्शनीको संयोजन भक्तपुर घरेलु तथा साना उद्योग संघ, भक्तपुर चेम्बर अफ कमर्श र मध्यपुर पर्यटन विकास समितिले गरेको थियो । प्रदर्शनीमा खाद्यान्न तथा मसला उद्योग, पस्मिना, खाने तेल, जुजु धौ, सेरामिक्स, नेपाली भेषभूषा तथा पुतली, हस्तकला, मुकुण्डो (मास्क मेकिङ), उडक्राफ्टलगायतका २५ वटा स्टल रहेका थिए । प्रदर्शनीमा टिकनीको चिउरा, माटोको भाँडा बनाउने विधि, नेपाली घरबुना तान र मुकुण्डो निर्माणको प्रत्यक्ष अवलोकन गर्ने व्यवस्था गरिएको थियो ।
प्रतियोगितासँगै आयोजित फाटो प्रदर्शनीमा मध्यपुर थिमिको कला सँस्कृति, रहनसहन र ऐतिहासिक घटनाक्रम झल्कने फोटो प्रदर्शनी गरिएको थियो । कुमारी पार्कमा आयोजित फोटो प्रदर्शनीको संयोजन फोटोग्राफर चन्द्र चक्रधरले गर्नुभएको थियो ।
यसैगरी बोडेका धिमे गुरु, साँस्कृतिक गुरु, जिब्रो छेडाएर जात्रालाई जिवन्तता प्रदान गर्दै आएका व्यक्तित्वहरुलाई पनि सम्मान गरिएको थियो ।
प्रतियोगिताको भक्तपुर क्षेत्र नं. २ का प्रतिनिधि सभा सदस्य सांसद दुर्लभ थापा, बागमती प्रदेशका सांसद सुरेश श्रेष्ठसमेत अवलोकन गर्नुभएको थियो ।
