भक्तपुर, मंसिर १७
कतारमा जारी फिफा विश्वकप फुटबल प्रतियोगिता २०२२ मा दक्षिण कोरिया सबैभन्दा बढी भाग्यमानी टोली सावित भएको छ । समूह एचमा उरुग्वेसँग अंक र गोल अन्तर बराबर भएपनि दक्षिण कोरिया बढी गोल गरेको आधारमा उरुग्वेलाई पछि पार्दै दोस्रो चरणमा प्रवेश गर्दै भाग्यमानी टोली बनेको हो ।
दक्षिण कोरियाले ४ गोल गर्दा ४ गोल नै खाएको थियो भने उरुग्वेले २ गोल गर्नुका साथै २ गोल व्यहोरेको थियो । दुवै टोलीको ३ खेलबाट ४ अंक र गोल अन्तर शुन्य थियो । फिफाको नियमअनुसार दक्षिण कोरियाले ४ गोल गरेको आधारमा नकआउट चरण प्रवेश गरेको हो ।
अल जानुब स्टेडियममा सम्पन्न शुक्रवार राती सम्पन्न खेलमा उरुग्वेले घाना विरुद्ध जित निकाले पनि प्रतियोगिताबाट बाहिरियो । उरुग्वेको जितमा जर्जियन डी अरेस्काटाले दुई गोल गरे । यसअघि खेलको २१ औं मिनेटमा घानाका आन्द्रे एयु पेनाल्टीमा चुके । उनको प्रहार उरुग्वेका गोलकिपर सर्जियो अल्भारेजले बचाए । रोसेटले पेनाल्टी क्षेत्रभित्र मोहमद कुडुसलाई लडाएपछि घानाले भिएआरको सहयोगमा पेनाल्टी पाएको थियो ।
खेलको २६ औं मिनेटमा जिअर्जिअन डे अरेस्काटाले गोल गर्दै उरुग्वेलाई सुरुआती अग्रता दिलाए । अरेस्काटाले गोललाइन नजिकबाट बललाई पोस्टभित्र छिराउँदै यस विश्वकपमा उरुग्वेको पहिलो गोल गरे । लुइस सुआरेजले पेनाल्टी क्षेत्र भित्रबाट गरेको प्रहार गोलरक्षक लरेन्स इटि जिगीले बचाएपनि रिबाउन्डमा अरेस्काटाले गोल गरेका हुन ।
त्यसपछि खेलको ३२ औं मिनेटमा अरेस्काटाले व्यक्तिगत दोस्रो गोल गर्दै उरुग्वेको अग्रता दोब्बर पारे । उनले सुआरेजले दिएको पासलाई सदुपयोग गरी गोल गरेका हुन । हावामा आएको पासलाई पहिलो टचमै हाफ भलीमा सुन्दर फिनिस गर्दै उरुग्वेको अग्रता दोब्बर पारेका हुन । खेलमा त्यसपछि थप गोल हुन नसकेपछि उरुग्वे विश्वकपमा पहिलो जित निकाल्यो । जित निकालेपनि अर्को खेलमा दक्षिण कोरियाले पार्चुगललाई पराजित गरेपछि उरुग्वे विश्वकपबाट बाहिरियो ।
अर्को खेलमा दक्षिण कोरियाले पोर्चुगलविरुद्ध सनसनीपूर्ण जित निकाल्यो । एक गोलले पछि परेको अवस्था उल्ट्याउँदैं दक्षिण कोरियाले पोर्चुगललाई २–१ ले पराजित गर्दै समूह एच को उपविजेता बन्दै विश्वकपको नकआउट चरणमा प्रवेश गर्यो । रोमाञ्चक खेलमा पोर्चुगलले शुरुवाती अग्रता लियो । पोर्चुगलले खेलको पाँचौं मिनेटमा रिकार्डो होर्टाको गोलमा शुरुआती अग्रता लिएको हो । डिओगो डालोटको कटब्याकलाई रिकार्डो होर्टाले ६ यार्ड बक्स नजिकबाट सुन्दर फिनिस गरे ।
तर, खेलको २७ औं मिनेटमा किम योङ जीओनले गोल गर्दै कोरियालाई १–१ गोलको बराबरीमा ल्याए । कर्नरमा क्लियर हुन नसकेको बललाई किम युङ–ग्वनले गोलमा परिणत गरे । ६ यार्ड बक्स भित्रबाट उनले गोल गरेका थिए ।
दोस्रो हाफको इन्ज्युरी समयमा कोरियाका ह्वाङ हि चानले गोल गर्दै खेल र समूहको समिकरणमा नै फेरबदल गरे । पोर्चुगलको कर्नर असफल भएपछि ह्युङ मिन सनले आफ्नो हाफदेखि बल अघि बढाउँदै पोर्चुगलको पेनाल्टी नजिक पुर्याए । सनले पेनाल्टी क्षेत्र बाहिरबाट दिएको पासलाई ह्वाङ हि चानले गोलमा परिणत गरे । चानको गोलले लगभग प्रतियोगिताबाट बाहिरी सकेको दक्षिण कोरिया प्रतियोगिताको दोस्रो चरणका प्रवेश गर्यो भने उरुग्वे जितका बावजुद् घर फर्किन बाध्य पार्यो ।
