भक्तपुर, भाद्र २२
बंगलादेश नेपाल मैत्री संघका अध्यक्ष एवम् ढाकाका वरिष्ठ साहित्यकार लायन मोसिउर अहमदको नेतृत्वको बंगलादेशका वरिष्ठ साहित्यकारहरुको प्रतिनिधि मण्डलले भक्तपुर नगरपालिकाका प्रमुख सुनिल प्रजापतिसँग बुधवार भेटवार्ता गरेको छ ।
भेटमा प्रमुख प्रजापतिले बंगलादेश र नेपाल भौगोलिक र सांस्कृतिक समानता भएको देश भएको बताउँदैं दुई देशबीचको अनुभव आदानप्रदानले दुई देशबीचका जनताबीचको सम्बन्ध अझ सुमधुर र प्रगाढ हुने विश्वास व्यक्त गर्नुभयो ।
बंगलादेशले धेरै नेपाली विद्यार्थीहरुलाई चिकित्सा शिक्षा र अन्य विषयहरुमा उच्च शिक्षा हासिल गर्ने अवसर प्रदान गरिरहेको बताउँदैं उहाँले नगरपालिकाले ख्वप विश्वविद्यालय सञ्चालन गर्ने आवश्यक तयारीहरु गरिरहेको अवगत गराउनुभयो । उहाँले साहित्यकारहरुले साहित्यमार्फत समाजको निम्ति योगदान गर्ने बताउँदैं बंगलादेशका उत्कृष्ट साहित्यहरु नेपालीमा अनुवाद गर्ने चाहना व्यक्त गर्नुभयो ।
त्यस्तै भक्तपुर नपाका उपप्रमुख रजनी जोशीले भक्तपुर नपाको संक्षिप्त परिचयबारे प्रस्तुतीकरण गर्दै नगरपालिकाले शिक्षा, स्वास्थ्य, सरसफाई, कला संस्कृति संरक्षणलगायतका सबै क्षेत्रहरुको सन्तुलित विकास गरेको बताउनुभयो । उहाँले भक्तपुर नगरपालिकालाई ज्ञान विज्ञानको केन्द्रको रुपमा स्थापना गर्ने उद्देश्यले अगाडि बढिरहेको बताउनुभयो ।
प्रतिनिधि मण्डलका नेता अहमदले भक्तपुर नगरपालिकाले शिक्षा क्षेत्रलाई प्राथमिकतामा राखेर गरिरहेको काम निकै प्रशंसनीय रहेको र भक्तपुरको भ्रमण गर्ने अवसर र न्यानो स्वागतको लागि धन्यवाद दिनुभयो । उहाँले नगरपालिका सबै क्षेत्रको सन्तुलित विकासका ािथ अघि बढीरहेको पाएको बताउनुभयो ।
सो अवसरमा संघका महासचिव सल्लाउद्धिन कुटुकवि, कवि तथा उपन्यासकार डा. अन्वारा सइद हक, कवि तथा साहित्यकारहरू प्रा.डा. दिलारा हाफिज, प्रा. शेली सेन गुप्ता, मोहम्मद मोसिउर रहमान र प्रसिद्ध गायक काजलकुमार मुखर्जीको उपस्थिति रहेको थियो भने नेपाली साहित्यकारहरु प्रतिक ढकाल, रामप्रसाद पन्त, शंकर भट्टराई, पवन आलोकलगायतको पनि उपस्थिति थियो ।
भेटपश्चात नगर प्रमुख प्रजापति सहितको टोलीले प्रतिनिधि मण्डललाई भक्तपुर दरबार क्षेत्रमा अवस्थित पुरातात्विक एवम् सांस्कृतिक महत्वका सम्पदाहरुको अवलोकन गराएको थियो ।
