भक्तपुर, मंसिर १६
भक्तपुर नगरपालिका–७, हनुमानघाटमा परम्परागत मौलिक शैलीको ‘खोह्र दीप ध्वाखा’ निर्माण गरिएको छ । भक्तपुर नगरपालिकाको योजना अनुसार स्थानीय उपभोक्ता समितिले सो ध्वाखा निर्माण गरिएको हो ।
ध्वाखा निर्माणका लागि रु.४८ लाख ६९ हजार ८ सय ६५ रुपैयाँ खर्च भएको खोह्र दीप ध्वाखा निर्माण उपभोक्ता समितिका कोषाध्यक्ष रत्नलाल साँधले जानकारी दिनुभयो । दायाँ बायाँ सहायक द्घार र बीचमा मुख्य द्धार रहेको खोहा दीप ध्वाखा निर्माणको लागि ४९ लाख ९५ हजार ९ सय ७४ रुपैयाँ भन्दा बढी आर्थिक सहयोग संकलन भएको साँधले बताउनुभयो । ध्वाखाको कार्य मूल्यांकन ५७ लाख ९ हजार ४४० रुपैंया रहेको छ ।
ध्वाखा निर्माणका लागि निर्माणका लागि भक्तपुर नगरका १८० वटा गुठीले आर्थिक सहयोग गरेको उपभोक्ता समितिका अध्यक्ष कृष्णगोविन्द खाईजुले बताउनुभयो ।
यसैगरी हनुमानघाटस्थित छिपा ताँ (छिपा पुल)को पनि पुनःनिर्माण सम्पन्न भएको छ । कुल एक करोड ७७ लाख ८ हजार ७३० रुपैंयाँमा उक्त पुल पुनःनिर्माण भएको छिपा ताँ निर्माण उपभोक्ता समितिका कोषाध्यक्ष लक्ष्मी रञ्जितले जानकारी दिनुभयो । उक्त पुलको कार्य मूल्यांकन २ करोड ९ लाख ९८ हजार ५१६ रुपैंया रहेको उहाँले बताउनुभयो ।
