भक्तपुर, असोज १६
नेपाली कांग्रेस चाँगुनारायण नगरसमितिले नगरकोटफेदी निवासी राम के.सीको उपचारार्थ उहाँको परिवारलाई आर्थिक सहयोग प्रदान गरेको छ । नेपाली कांग्रेसका क्रियाशील सदस्य समेत रहेका के.सी अल्काई रोगको उपचारका क्रममा संक्रमण भई थप उपचारको लागि बुद्धमाई फाउण्डेशन प्रा.लि, टेकु, काठमाण्डौमा उपचाररत हुनुहुन्छ ।
नेपाली कांग्रेस जिल्ला विपद् सहायता कोष, क्षेत्र तथा नगर समिति र वडा समितिका पदाधिकारी तथा सदस्यहरुलगायत मानवीय सेवाभावबाट प्रेरीत सहयोगीमन भएका महानुभावहरुबाट संकलित ५९ हजार रुपैया चाँगुनारायण नगर समितिका सभापति शिवहरी के.सी तथा वडा नं ६ का वडा सभापति बिरमान तामाङ्गले संयुक्त रुपमा के.सीका दाजु ज्ञान बहादुर के.सीलाई हस्तान्तरण गर्नु भएको थियो ।
सहयोग रकम हस्तान्तरण गर्नुहुदै नगर सभापति के.सीले आपत् विपद्का समयमा मानवीय सेवा भावले आर्थिक अवस्था कमजोर भएका ब्यक्तिहरुलाई सहयोग गर्नु सबैको दायित्व भएको बताउनुभयो ।
विरामी के.सीको आर्थिक अवस्था अत्यन्तै कमजोर भएकोले नेपाली कांग्रेस बागमती प्रदेशका संसदीय दलका उपनेता सांसद कृष्णलाल भँडेल र नगरकोटका क्षेत्रीय प्रतिनिधि हरिशरण बास्तोलाको समन्वयमा नेपाली कांग्रेस चाँगुनारायण नगर समितिकोे पहलमा उपचारको लागि सहयोग रकम संकलन गरीएको नगर समितिका सचिव दिनेश थापाले बताउनुभयो ।
उपचार सहयोग रकम हस्तान्तरण कार्यक्रममा चाँगुनारायण नगरसमितिका उपसभापतिद्वय राजेन्द्र कुमार दाहाल र दिनेशराज गिरी, सचिवद्वय दिनेश थापा र सिजन कार्की, सहसचिव गोकर्ण पुरी, क्षेत्रिय प्रतिनिधिहरु गोकुलराज खत्री, हरीशरण बास्तोला, रमेश के.सी लगायतको उपस्थिती रहेको थियो ।
