भक्तपुर, असोज ८
यौन प्यास मेटाउन भन्दै १३ वर्षिया बालिकालाई जबरजस्ती करणी गरेको अभियोगमा भक्तपुर प्रहरीले २५ वर्षिय युवकलाई पक्राउ गरी बिहिवार सार्वजनिक गरेको छ । पक्राउ पर्नेमा सिन्धुली साविक झागाझोली गा.वि.स. वडा नं. ४ हाल परिवर्तित सुनकोशी गाँउपालिका वडा नं. ४ बस्ने २५ वर्षिय मिठाराम धिमाल छन ।
धिताललाई भक्तपुर प्रहरीले बुधवार महोत्तरीको बर्दिवास नगरपालिका १ मा लुकीछिपी बसीरहेको अवस्थामा पक्राउ गरिएको महानगरिय प्रहरी परिसर भक्तपुरका सूचना अधिकारी प्रहरी उपरिक्षक दिपक गिरीले बताउनुभयो । धिताललाई परिसरका प्रहरी नायव निरिक्षक टपेन्द्र भण्डारी नेतृत्वको प्रहरी टोलीले पक्राउ गरिएको हो ।
धितालले गत साउन १५ गते १३ वर्षिया बालिकालाई मध्यपुर थिमि ४ स्थित सिजन गेष्ट हाउसमा लगेर जबरजस्ती करणी गरेको भन्दै बालिकाका अभिभावकले साउन १८ गते किटानी जाहेरी दिएका थिए । धितालले प्रारम्भिक अनुसन्धानमा यौन प्यास मेटाउन १३ वर्षिया बालिकालाई गेष्ट हाउसमा लगेर यौन सम्पर्क गरेको बताएको प्रनाउ गिरीले जानकारी दिनुभयो । उनलाई कानुन बमोजिम म्याद थप गरी अनुसन्धान भइरहेको प्रहरीले जनाएको छ ।
