भक्तपुर, जेठ २४
नेकपा एमालेको माधव–झलनाथ समूहले पार्टी अध्यक्ष एवम् प्रधानमन्त्री के पी शर्मा ओलीको प्रस्तावको जवाफ दिएका छन । आफ्नो समूहका स्थायी समिति सदस्यहरुसँग दिउँसो भएको छलफलका आधारमा नेता माधवकुमार नेपालले सोमवार सााझ विज्ञप्तीमार्फत जवाफ दिनुभएको हो ।
अध्यक्ष ओलीले आइतवार साँझ अप्रत्याशितरुपमा पार्टी एकताको लागि ६ बुँदे प्रस्ताव राख्दै आफु २०७५ जेठ ३ गते अगाडिको अवस्थामा पार्टीलाई लैजान तयार भएको तर त्यसका लागि नेपाली कांग्रेसका सभापति शेरबहादुर देउवालाई प्रधानमन्त्री बनाउनु पर्ने माग गर्दै सर्वोच्च अदालतमा दायर गरेको रिट निवेदनमा हस्ताक्षर गरेका एमाले सांसदहरुले हस्ताक्षर फिर्ता लिनुपर्ने शर्त राख्नुभएको थियो ।
जवाफमा नेता नेपालले ओलीले संसद विघटन गर्ने निर्णय फिर्ता लिएमा आफुहरुले हस्ताक्षर फिर्ता लिने बताएका छन । नेपालले एकताका लागि ओलीले राखेका ६ प्रस्तावको एक÷एक गरेर जवाफ दिएको छ । नेपालले जारी गरेको विज्ञप्तिमा ओलीले अगाडि सारेका कुराहरु पार्टीको एकतालाई अक्षुण राख्न नवौं राष्ट्रिय महाधिवेशनको निर्णय र पार्टी विधान तथा सर्वोच्च अदालतको फैसलाको अन्तर्य अनुरुप नभएको ठहर गरेको छ ।
‘उहाँको वक्तव्यमा प्रयोग गरिएको भाषा र बुँदाहरु केलाउँदा जालझेल, अन्योल र भ्रमको आधारमा अरुलाई अल्मल्याउने र विभाजित गर्ने दुराशय देखिन्छ’, विज्ञप्तिमा भनिएको छ,‘अतः पार्टी विधान अनुरुप पार्टीलाई एकताबद्ध बनाउने उहाँको सोच नै नरहेको देखिएकोले अध्यक्ष केपी ओलीको वक्तव्यको भ्रममा नपरी सशक्त रुपमा पार्टीको समग्र एकता, संगठन निर्माण र सञ्चालनको मार्गमा अघि बढ्न हामी पार्टीका सम्पूर्ण इमान्दार नेता, कार्यकर्ता, सदस्य र शुभेच्छुकहरुमा हार्दिक आव्हान गर्दछौं ।’
हेर्नुहोस् माधवकुमार नेपालको जवाफको पूर्णपाठ
